Shënim/ Mos humbni kohë me Lulzim Bashën!

10 Nëntor 2019, 18:23, Opinione CNA

Në kuadër të sipërmarrjes së një aksioni të ri politik opozitar, pak ditë më parë, kryetari i Partisë Demokratike, Lulzim Basha, nisi turin kombëtar të shpresës, sikurse e ka etiketuar, për ti ngjallur besimin dhe optimizmin shqiptarëve tek e ardhmja opozitare e qeverisjes (në fakt tek e ardhmja e bërjes së tij Kryeministër). Ndërkohë që nisja e kësaj skeme të re opozitarizmi, nga PD po komentohet me nota besimi për çmontimin dhe marrjen butësisht të pushtetit nga Edi Rama, zëra të tjerë e vënë në dyshim suksesin e një qeverie nën kryesimin e Bashës. Jo për faktin se kabineti i “rilindasve” dhe kreu prijësues i këtyre të fundit është më i mirë se Lulzim Basha, rivali i tij për kryeministër, por sepse të gjitha aksionet e deritanishme opozitare të projektuara dhe zbatuar nga Basha kanë përfunduar si “flluskë e plasur”.

Duke mos ja dalë as ta plasaritin e jo më ta tundin nga themelet Qeverinë e Edi Ramës, të cilin opozitarëve u pëlqen ta etiketojnë de fakto të rrëzuar.

Gjë që edhe mund të vlerësohet si një e vërtetë, mirëpo ja që, megjithse Edi Rama ka rënë, sërish ai vijon të qeverisë pa iu dridhur qerpiku fare nga aksionet që Basha dhe aleatët e tij opozitar ndërmarrin.

Sepse as nga gjithë ata flakadanë, që për muaj me rradhë ndezi opozita ndër protestat me ulërimat:”Rama IK!, shpesh dhe të dhunëshme, Edi Ramës nuk iu përcëllua as dhe një fije qerpiku apo mjekre. Përse?

Dhe këtu ngre krye arsyeja e mosbesimit në suksesin e kësaj lëvizjeje të re opozitare për ngjalljen e shpresës dhe rikthimin e besimit tek PD-ja e tharë nën drejtimin e Lulzim Bashës. I cili deri më sot, megjithëse është venë disaherë në provë, qoftë si zyrtar i sferës së lartë të qeverisë, qoftë si kryetar disa vjeçar i PD-së nuk ka shpërfaqur ndonjë arritje që të bëj të jesh optimist për ti besuar ringritjen e forcimin e PD-së si dhe fronin e drejtuesit të një Qeverie të re, post të cilin ua përmend tubuesve në çdo qytet ku ka organizuar turin e shpresës. Përkundrazi pas zbritjes nga postet e falura Basha ka lenë pas një mal me premtime të pambajtura, pra mashtrime, gjurmë abuzimi dhe shkatërrimin e PD-së, partisë simbol të antikomunizmit. Dështime këto të rrjedhura nga paaftësia totale dhe vesi patologjik i mashtrimitdhe përfitimit me çdo kusht.

Këto dhe vetëm këto janë arsyet e vërteta përse edhe rikthimi i aksionit opozitar për rrëzimin e kryeministrit Rama, nëpërmjet turit paqësor opozitar mbarëkombëtar për ngjalljen e shpresës, pra një forme krejtësisht të kundërt me protestat shumëmujore të flakadanëve, që i vërsuleshin godinave të institucioneve të larta të pushtetit, zor të besohet se do të sjellë bereqetin e shumëdëshiruar.

Zor të besohet se do të sjellë rrëzimin e Qeverisë Rama dhe ndryshimin aq shumë të dëshiruar jo vetëm nga populli opozitar por dhe nga pjesa dërmuese e shqiptarëve votues, të cilët, të zhgënjyer e të bindur se po vuajnë mashtrimet elektorale të Edi Ramës, mbeten duarlidhur përsa kohë opozita të mos jetë e duhura dhe drejtuesi i saj, me “kulturë perëndimore”, të shes si rinovim ndërrimin e kuajve e të rrotave të karrocës, por jo karrocierin Lulzim Basha dhe vetë karrocën e bërë rrangallë prej tij. Ndaj, për të gjitha këto e të tjera të pathëna, mos humbni më kohë duke besuar dhe mbajtur shpresë tek Lulzim Basha dhe “Republika e Re” e tij, por projektoni si ta largoni një orë e më parë nga kreu i partisë. /CNA.al