web counter
LEXO PA REKLAMA!

SHKARKO APP

App Store
Google Play

E fundit!

x

Ktheu tri ligje, bllokoi kreun e SHISH dhe paktin detar/ Meta-Rama në “luftë” të hapur?

7 Gusht 2018, 06:42, Aktualitet CNA

Kryeministri Edi Rama dhe presidenti Ilir Meta duket se tashmë janë në luftë të hapur mes tyre. Zgjedhjet parlamentare të 25 qershorit 2017 sollën fundin e bashkëpunimit PS-LSI, ku nuk munguan sulmet dhe akuzat. Por mazhoranca më 24 korrik mori pjesë në ceremoninë e betimit të Metës dhe më pas kryeministri deklaroi disa herë se presidenti është politikan karriere dhe e vlerësoi. Mirëpo kjo situatë ka zgjatur vetëm disa muaj, pasi në 1-vjetorin e betimit të Metës, janë rikthyer tensionet dhe përplasjet.

Dy rastet më të fundit janë kthimi i ligjit për teatrin dhe të atij për tatimin e lojërave të fatit. Por më herët Meta ka thyer për rishqyrtim dhe një tjetër ligj, atë për tarifat gjyqësore. Pra në total në kuadrin e 1 viti në detyrë, Meta ka thyer në Parlament 3 ligje, shkruan Gazeta “SOT”.

Gjithashtu Meta prej 8 muajsh ka mbajtur të bllokuar kreun e ri të Shërbimit Informativ Shtetëror. Në tetor 2017 ai dha dorëheqjen dhe në fund të muajit shefi i qeverisë propozoi në këtë post Helidon Bendon, nënkryetar i SHISH. Por Meta që në atë kohë dha sinjale se nuk do e pranojë një gjë të tillë dhe momentalisht SHISH zyrtarisht nuk ka kryetar, ndonëse Bendo vijon të ushtrojë funksionin. Nga ana tjetër, Rama ja ka bërë të qartë Metës se nuk do propozojë emër të ri.

Në korridoret politike flitet se Meta po e mban kreun e SHISH si ?As? nën mëngë pasi në fund të vitit do duhet të emërohen dhe Guvernatori i BSH dhe kreu i KLSH. Të dy këta emra propozohen nga Presidenca dhe emërohen nga mazhoranca. Nëse s?ka konsensus Rama-Meta, nuk emërohen dot. Me shumë gjasë krerët e këtyre 3 institucioneve do kthehen në pazar politik.

Përveç refuzimit të tre ligjeve dhe bllokimit të kreut të SHISH, Meta ka sfiduar Ramën dhe paktin detar me Greqinë. Meta e mbajti të bllokuar prej 3 muajsh paktin, pasi nuk i jepte autorizim ministrit Bushati. Por dhe tani po vijohet me të njëjtën rrugë. Që drafti të shkojë për miratim në Parlament duhet firma e Metës. Ky i fundit ka dhënë sinjale se mund të presë Gjykatën Kushtetuese dhe nëse ndodh kjo, atëherë marrëveshja detare do të shtyhet dhe për disa muaj.

Një tjetër përplasje janë organet e reja të drejtësisë. Ilir Meta ka në dorë shortin për Këshillin e Emërimeve në Drejtësi. Ky organ ka mbetur me 4 anëtarë dhe Presidenti ende nuk ka vendosur për shortin, nëse do e hedhë ai apo Parlamenti. Po ashtu pak ditë më parë u duk se u rreshtua krah opozitës. PD ka propozuar një paketë për të rishikuar ligjet që u miratuan pa votën e saj. Meta në një studio televizive tha se atje ku është e nevojshme duhet të ndërhyhet. Vetë kryeministri e ka thënë se ligjet e reformës nuk preken. Pra, në një vit si president, Meta ka një sërë përplasjesh me qeverinë dhe kjo ka bërë që shumë deputetë socialistë të irritohen me të. Vetë Taulant Balla reagoi ashpër ndaj tij kur ktheu për rishqyrtim ligjin për teatrin.





Lajmet e fundit nga