Financimi miliardësh i shoqatave/ Çfarë fshihet pas shifrave të rreme?

3 Maj 2018, 17:58, Aktualitet CNA

Një ditë më parë CNA.al publikoi financimin e shoqatave të shoqërisë civile nga ana e institucionit me emërtesën “Agjencia për Mbështetjen e Shoqërisë Civile”(AMSHC), i cili financohet nga buxheti i shtetit, pra i taksapaguesve. Objekti i punës së kësaj strukture është mbështjetja e projekteve të paraqitura e që kanë vlefshmëri për publikun e gjerë.

Nga dokumentacioni që disponon CNA.al rezulton se krahas disa projekteve fituese që vërtetë kanë të tillë vlefshmërie, rezultojnë edhe të tjerë që edhe vetë emërtimin e kanë absurdë e jo më dobishmërinë. Sikurse ka shoqata të njohura për lidhje me politikën qeverisëse, pjesë e të cilës është edhe vetë AMSHC, që deri dje përbëhej nga besnikë të ish partisë në pushtet dhe financonte shoqata që i shërbenin interesave të saj.

Po të ndjekësh ecurinë ndër vite të AMSHC-së, kupton se më shumë se strukturë që stimulon shoqërinë civile në ndërmarjen e aksioneve në dobi të takspaguesve, kjo njësi e pushtetit ekzekutiv ka shërbyer për shpërblimin e kontributit që drejtuesit e këtyre shoqatave kanë dhenë në dobi të partive qeverisëse.

Gjithsesi le ta lemë deri këtu konstatimin, që do jetë pjesë e një tjetër publikimi, dhe të qendrojmë tek thelbi i këtij temës së këtij shkrimi.

Në të dhenat e ofruara për CNA.al, Alkent Shehaj, i prezantuar si inspektor i Sektorit të Financës dhe Kontrollit te Brendshëm të AMSHC, referoi dy palë shifra. Njerën nëpërmjet vënies në dispozicion të tabelave të shoqatave fituese të proketeve përgjatë viteve 2015, 2016 dhe 2017 (për vitin 2018 tha se ende nuk janë gati), dhe një tjetër shifër në vijim të këmbënguljes së CNA.al për të dhenë totalin si zë më vete.

Në përgjigjen e dytë, dt.02 maj 2018, z.Shehaj komunikoi se “Buxheti Vjetor i AMSHC per grante nga 2015-2018 eshte 101 milion”, ose 1 miliard 010 milionë (të vjetra), ndërkohë që nga përllogaritja që CNA.al bëri prej të dhenave të tabelave të mëposhtëme shifra e totalit financues për këto tre vite rezulton të jetë 291.200 000 lekë, ose 2.912.000.000 lekë (të vjetra). Një diferencë kjo gati dy fish më shumë nga sa ka referuar z.Shehaj në përgjigjen e dytë.

Në vijim të të vërtetës, sipas tabelave financiare, që disponon CNA.al, rezulton se në vitin 2015 shoqatave u janë dhenë 735.000.000 lekë (të vjetra), një vit më vonë, pra në vitin 2016 u janë akorduar 846. 000.000 lekë.

Në vitin 2017 fondi i financimit është plot 1.331.000. 000 lekë, pra më shumë se shifra 1.010.000. 000 (të vjetra) e servirur nga z.Shehaj në përgjigjen e dytë. Gjë që ngre dyshime jo vetëm për mosqenien serioze të ASHMC-së, por ngre hije dyshimi se diçka fshihet pas kësaj servirjeje të rremë. Pikërisht mbi këtë të fundit do të hedhë dritë në ditët vijuese CNA.al.