Statistika tmerruese/ Mbi 400 vrasje në Kosovën e pasluftës

18 Mars 2018, 16:48, Aktualitet CNA

Brenda dhjetë vjetësh në Kosovë, sipas të dhënave të Policisë së Kosovës, kanë ndodhur 419 vrasje. Ndërkohë, vetëm gjatë janarit dhe shkurtit të këtij viti numërohen 5 raste të tilla.

Motivet e këtyre vrasjeve thuhet se janë të ndryshme. Zëdhënësi i Policisë, Bajram Krasniqi thotë për radion “Evropa e Lirë” se në vitet e fundit numri i vrasjeve ka shënuar rënie.

?Derisa në vitin 2008 kanë qenë 45 raste të vrasje, në vitin 2010 numri i vrasje ka qenë më i lartë 59. Në vitin 2012 janë shënuar 50 vrasje dhe që nga ky vit, numri i këtyre rasteve ka shënuar rënie, ku në vitin 2017 kemi pasur 27 vrasje. Motivet janë të ndryshme, por motivi përfundimtar i një vrasjeje zbulohet kur rasti përfundon në organet e drejtësisë. Ne mund të dyshojmë se një vrasje është kryer për motive të ulëta, si hakmarrje apo të ndryshme, por gjatë hetimeve mund të ndërrojë kjo?, thotë Krasniqim transmeton “Rel”, duke vijuar raportimin:

Armët në posedim të paligjshëm nga qytetarët, që qarkullojnë në Kosovë, sipas ekspertëve të sigurisë, thuhet se janë shkaktarët kryesorë për pjesën dërmuese të vrasjeve dhe të një sërë krimesh që kanë ndodhur.

Eksperti i çështjeve të sigurisë, Avni Islami thotë për radion “Evropa e Lirë” se posedimi i armëve pa leje është një kërcënim për sigurinë e qytetarëve.

?Si pasojë e këtyre vrasjeve është numri i madh i armëve ilegale. Në Kosovë pas përfundimit të luftës konsiderohet se në duart e qytetarëve janë rreth 350 mijë armë, duke filluara nga armët e zjarrit deri tek ato të gjuetisë. Është një problem shqetësuese dhe deri më tani institucionet e Kosovës nuk kanë gjetur zgjidhje, që së paku armët luftarake të largohen nga duart e qytetarëve, dhe të iu dorëzohen institucioneve kompetente. Pra, si pasojë e këtyre armëve kemi një numër të tillë të vrasjeve?, thotë Islami.

Këtë e përforcon edhe zëdhënësi i Policisë së Kosovës Bajram Krasniqi, kur pohon se nga paslufta, mekanizmat e sigurisë, kanë konfiskuar dhe asgjësuar armë të llojeve të ndryshme.

“Në vitin 2017 ka konfiskuar mbi 1211 armë dhe 30 mijë copë municione të ndryshme. Përveç konfiskimit, Policia ka bërë fushata që armët të mos përdoren as në ahengje festive, as në konfliktet të ndryshme që mund të kenë mes vete qytetarët?, thotë Krasniqi.