Gara e agjencive publicitare/ Bien fitimet

10 Shkurt 2018, 17:14, Ekonomi CNA

Me tregun e reklamave që nuk po rritet prej vitesh, kohë të vështira kanë ardhur edhe për agjencitë publicitare. Ato do të duhet të rindajnë mes tyre tortën e të ardhurave dhe të përpiqen që t?u mbushin mendjen klientëve që të kalojnë më shumë buxhet përmes agjencive. Bizneset tentojnë që të negociojnë direkt me reklamuesit, sidomos për shitjen dhe blerjen e hapësirave publicitare.

Pavarësisht tregut në tkurrje, agjencitë po arrijnë të kenë më shumë të ardhura, por këtë po e bëjnë në kurriz të fitimeve.
Qarkullimi vjetor i 18 agjencive kryesore publicitare në vend u rrit me rreth 20% në 2016-n, pas rënies prej 5% me bazë vjetore në vitin 2015 (shiko tabelën: Të ardhurat e agjencive kryesore publicitare në vend, lekë). Të ardhurat totale të tyre ishin rreth 22 milionë euro, duke treguar se rreth gjysma e tregut të reklamave në vend kanalizohet përmes agjencive publicitare. Ndryshe nga të ardhurat, fitimet kanë rënë për më shumë se gjysmën e agjencive. Ekspertët e tregut pohojnë se tkurrja e fitimeve lidhet me shtimin e konkurrencës, që çon në uljen e marzheve të shitblerjes së hapësirave publicitare dhe rritjen e kostove të tjera të aktivitetit, si p.sh. personeli.

Aktiviteti i agjencive është shumë i luhatshëm, në varësi të klientëve që mund të humbin, apo fitimit të të rinjve dhe qarkullimi vjetor i tyre paraqet luhatje të mëdha nga njëri vit te tjetri. Pjesa më e madhe e qarkullimit të tyre vjen nga blerja e hapësirave publicitare, por që sipas aktorëve të tregut ka dhe marzhin më të ulët të fitimit, ndërsa më fitimprurëse janë shërbimet e tjera si krijueshmëria dhe prodhimi i spoteve, aktivitete të tjera marketingu etj., të cilat gjithnjë e më shumë kanë filluar të ofrohen nga agjencitë në vend.
Vitet e fundit, agjencitë e mëdha kanë konsoliduar aktivitetin, ndërsa hyrjet e reja, ndonëse tentojnë të rriten, mbeten me qarkullim relativisht të ulët.

Le Spot Group është operatori më i madh në këtë segment. Të ardhurat e kompanive të grupit, sipas bilancit përmbledhës të Le Spot për vitin 2016 ishin 1.8 miliardë lekë (rreth 13 milionë euro), me një rënie prej 5% në krahasim me vitin e mëparshëm. Kompanitë kryesore të saj janë Unlimited Media, Le Spot Production, Spot Communication, Optimum Media (indirekt), ndër më të mëdhatë në tregun e agjencive të publicitetit (shih tabelën). Vodafone, reklamuesi më i madh në vend, është klienti kryesor i grupit. Grupi ka gjithsej në pronësi direkte 12 shoqëri, ku më kryesorja është Unlimited Media.

Ogilvy ka shënuar vitin e dytë me aktivitet në rritje, duke u zgjeruar të ardhurat me 167% në 2016-n dhe duke u renditur si agjencia e dytë më e madhe në vend, pas Unlimited Media, që kryeson në listën e agjencive më të mëdha në vend.
Në vend të tretë është Spot Communication (pjesë e grupit të Spot).

McCann Tirana dhe Landmark Communication kanë pasur aktivitete pozitive, duke rritur të ardhurat përkatësisht me 67.3% dhe 13.9%.
Të ardhurat vjetore të agjencive të tjera janë më të ulëta se 1 milion euro. Kompanitë e vogla me rritjen më të shpejtë për 2016 janë Vatra Design Consultancy (V Advertising ltd), Source One, Gogel. Rritja e agjencive që merren me organizim eventesh ka reflektuar diversifikimin e fushatave të kompanive kryesore, për të shkuar direkt te klienti, jo vetëm përmes medias masive. /Monitor