web counter
LEXO PA REKLAMA!

SHKARKO APP

App Store
Google Play

E fundit!

x

Transporti ndërkombëtar drejt falimentit nga taksa e peshës/ Vendet e rajonit përfitojnë nga shmangia e lejeve CEMT

28 Qershor 2016, 07:33, Ekonomi CNA

Transporti ndërkombëtar rrugor në Shqipëri prej kohësh është në mëshirë të fatit, pa një busull orientuese që ta sjellë në shinat e duhura. Mungesa e një strategjie afatgjatë dhe mosfunksionimi i organeve shtetërore të linjës, politikat fiskale ?rrjepëse?, si dhe mungesa prej vitesh e kualifikimit profesional të stafit drejtues në këtë sektor ka bërë që Shqipëria tashmë të ketë humbur mundësinë e saj për të qenë lider në rajon ku gjithmonë e më tepër bie në sy dominimi i kompanive të transportit nga Maqedonia, Serbia, Bullgaria apo edhe atyre nga Mali i Zi. Shembulli më tipik i dështimit të qeverisë shqiptare janë premtimet boshe me kartolina 500 euro të fundvitit nga kryeministri Rama për kompanitë e transportit ndërkombëtar. Taksa e peshës dhe ajo ACE janë akoma në fuqi dhe çdo mjet i targuar në Shqipëri diskriminohet duke paguar një shumë prej 500 eurosh në çdo udhëtim përtej Adriatikut. Shteti Italian prej dekadash diskriminon transportuesit shqiptarë ndaj atyre të shteteve të tjera të rajonit, ndërkohë që eksportet Italiane drejt Shqipërisë janë më të mëdha se në vendet e tjera të rajonit.

Mungesa e kontrolleve për lejet CEMT

Penalizimi që i bëhet në taksim kamionëve shqiptarë ka bërë që kompanitë e transportit nga Maqedonia, Mali i Zi, Serbia apo edhe Bosnja Hercegovina të gjejnë parajsën në Shqipëri, duke marrë pjesë të mira të trafikut të mallrave midis Italisë dhe Shqipërisë. Kjo nuk do ndodhte nëse autoritetet doganore do bënin punën e tyre duke kontrolluar lejet CEMT sikundër bën çdo autoritet doganor në Europë. Sipas konventës CEMT, mjetet e një shteti tjetër janë të detyruara të kthehen në shtetin e origjinës pas 3 udhëtimesh në vendet e marrëveshjes CEMT dhe kjo gjë vërtetohet nga vulat që doganat vendosin në bllokun e udhëtimit që çdo mjet duhet të ketë me vete. Kur ia kërkon këtë gjë doganës shqiptare, ata ngrenë supet pasi asnjë doganier deri më sot nuk ka bërë as edhe një trajnim për marrëveshjen CEMT, të cilën Parlamenti Shqiptar e ka ratifikuar. Drejtuesit e doganës mjaftohen me udhëzime që flenë në arshivat e doganave lokale dhe askush nuk i zbaton. Akoma më e rëndë është situata kur as kontrollorët e DRSHTRR që janë të ngarkuar me ligj për të kontrolluar dhe penalizuar këto shkelje nuk kanë njohuritë minimale për rregullat e marrëveshjes CEMT. Në këto kushte dëgjon rëndom nëpër doganat shqiptare shoferë të mjeteve të huaja që me një buzëqeshje tallëse përmendin kafen 10 euroshe, ndërkohë që dëmi që i bëhet arkës së shtetit por edhe kompanive të transportit nga kabotazhi në transport është i pallogaritshëm.

Mungesa e kartave dixhitale të takografit

Prej vitesh, DPSHTRR nuk ka bërë tenderin e kartave dixhitale të shoferit për takografin digjital. Kjo ka sjellë që shumë mjete të viteve të fundit të pajisur me pajisjen e takografit digjital të mos jenë konform rregullave të transportit në Europë. Shumë transportues janë detyruar të heqin këto pajisje për ti zëvendësuar me ato analoge të cilat, nuk lejohen të montohen në mjetet e prodhuara mbas vitit 2010. Në shumë raste transportuesit shqiptarë janë detyruar të paguajnë nga 2.200 euro deri në 8000 euro (sipas shteteve) dhe 3 muaj bllokimin e mjetit për këtë parregullsi. Ai i rimburson shteti shqiptar këto kosto që vijnë si mosrealizim i detyrimeve të tij nga ratifikimi i marrëveshjeve shqiptare? Përgjigja është e kuptueshme dhe e ditur, që biznesi nuk përfiton asgjë. /SOT





Lajmet e fundit nga