Vërshon dhënia me qira e tokave bujqësore, edhe 45 ha të tjera në Fier

5 Gusht 2016, 11:50, Ekonomi CNA

Ministria e Bujqësisë po vijon më intensitet dhënien e tokave shtetërore në qira për qëllime të zhvillimit të bujqësisë. Këto ditë janë përfshirë në procedurat e dhënies me qira të 45 hektarë tokë bujqësore në Libofshë të Fierit.

Vlera fillestare e qirasë së tokës bujqësore në pronësi të shtetit për hapjen e procedurës konkurruese është 558,090 lekë në vit ose 12,185 lekë për hektarë në vit.

Rregullat e kërkojnë që ofertuesit të paraqesin vetëm një ofertë, ku të angazhohen se pranojnë kushtet e përcaktuara në ftesën për procedurë konkurruese dhe detyrimet që rrjedhin nga fitimi i procedurës konkurruese.

Nga fundit i 2014, Ministria e Bujqësisë ka organizuar mbi 40 ankande për rreth 2000 hektarë tokë bujqësore në zonat më pjellore të vendit.

Sipas të dhënave zyrtare nga Ministria e Bujqësisë, tokat ndodhen në zonat më prodhimtare të Shqipërisë si Krutja, Buçimasi në Pogradec, komunat të begata në Fier dhe në Lushnjë dhe pothuajse asnjë hektar në Veri.

Në ndryshimet që ju bënë ligjit të koncesioneve të vitit 2013 u përfshi edhe sektori i bujqësisë, i cili nuk ishte më parë, ndërkohë që nuk janë të pakta rastet që Agjencia e Prokurimit Publik shpall zhvillimin e tokës bujqësore nëpërmjet kësaj forme.

Burimet nga dikasteri thonë se, toka është me pronësi shtetërore dhe është identifikuar si e tillë pas një inventarizimi të posaçëm që nisi sapo e majta erdhi në pushtet në shtator të vitit 2013.

Vitet e fundit ndërtuesit kanë vërshuar në transferimin e investimeve në bujqësi, teksa institucionet publike i kanë lënë vetëm në një eksperiment të rrezikshëm.

Problemet me pronësinë mungesën e njohurive (know how) dhe financimet e pasigurta, plus risku që vjen nga kushtet e klimës i bëjnë të brishta investimet e reja pavarësisht se, nisja shihet të jetë pozitive.

Ngutja për zhvendosjen masive drejt fermave dhe stallave në jo pak raste është shoqëruar me gabime fatale. Dhia apline nuk mund të rritet në Vorë dhe buajt nuk rriten në Kukës. Por ka edhe fryte. Prodhimi i luleshtrydhes është një shembull, ku prodhimi i zgjeruar këtë vit, jo vetëm ka plotësuar nevojat e tregut vendas me një çmim shumë të favorshëm, por ka tentuar edhe eksportin./monitor/