Monika Kryemadhi, si gjenerali i ushtrisë së vdekur

22 Dhjetor 2017, 13:06, Aktualitet CNA

Kryetarja e LSI, Monika Kryemadhi po luan rolin e një opozitarje të fortë, siç u pa në protestën e së hënës, ndërsa bën edhe skena në parlament, duke gjuajtur me çizme.

Por gjithcka është veçse një teatër i Monikës, për tu dukur si ?opozitare? e fortë, kur në realitet ajo është braktisur nga të gjithë, përjashtuar Endrit Braimllarin, Petrit Vasili, apo Klajda Gjoshën, e cili i mori çizmen Gardës.

Braktisja e e Monikës u pa edhe gjatë protestës së opozitës, ku nga pas i shkonin vetëm disa fëmijë.

Një tjetër fakt që tregon se ?ushtria? e Monikës është shpërndarë, janë edhe këshilltarët e LSI në Këshillat Bashkiakë.

Vetëm në Tiranë, pasi Kryemadhi është bërë kryetare e LSI, i kanë ikur katër këshilltarë bashkiakë, ku rasti më i fundit ishte pikërisht dje. Në mbledhjen e djeshme të Këshillit Bashkiak të Tiranës, këshilltarja e LSI, Bora Panajoti u bashkua me Veliaj, duke votuar pro pr.buxhetit 2018.

Kujtojmë këtu se edhe me 27 korrik të këtij viti, dy këshilltarë bashkiakë të LSI, Genta Mezini e Agim Kraja, votuan pro, rritjes së çmimit të ujit të pijshëm në Tiranë.

LSI në atë kohë sqaronte se votimi i tyre ishte tërësisht personal dhe për interesa korruptive.

Po ashtu, me datë 23 nëntor të po këtij viti, Naim Halili është një tjetër këshilltar i Lëvizjes Socialiste për Integrim i cili votoi pro projektvendimeve të Bashkisë së Tiranës, në mbledhjen e Këshillit Bashkiak.

Në një reagim për mediat ai ka sqaruar se vota e tij ?pro? ishte për të mos bllokuar punën në Tiranë. Duke vlerësuar punën e bërë deri më tani nga kryebashkiaku Veliaj. Dhe më pas Halili iku nga LSI, duke ju bashkuar PS.

Pra, në Tiranë u bënë gjithsej katër këshilltarë bashkiakë që kanë ikur nga LSI.

Mësohet se e njëjta situatë ka ndodhur edhe në qytetin e Korçës, ku 5-6 anëtarë të LSI në Këshillin Bashkiak janë gati të shkojnë te PS, por nuk i merr kryebashkiaku Sotiraq Filo.

Ndërkohë në mbledhjen e djeshme të Këshillit Bashkiak të këtij qyteti, 4 këshilltarë të LSI-së kanë votuar pro buxhetit të paraqitur nga kryetari i Bashkisë, Sotiraq Filo. Ndërsa e njëjta situatë paraqitet edhe në qytete të tjera, si në Elbasan,Durrës apo Lezhë.

Mesa duket Monika Kryemadhit i është shpartalluar ushtria dhe LSI, është një parti në agoni, drejt vdekjes, pasi kur nuk ka tepsi, LSI vdes.

Të gjitha faktet e sipërpërmendura tregojnë se së shpejti Kryemadhin do ta kemi gjenerale të ushtrisë së vdekur./ CityNews