Basha me FMN: Taksat e larta, burokracia dhe korrupsioni pengojnë rritjen ekonomike dhe investimet e huaja

29 Shtator 2017, 15:18, Aktualitet CNA

Kreu i Partisë Demokratike, Lulzim Basha, ka pritur sot në një takim shefen e misionit të Fondit Monetar Ndërkombëtar për Shqipërinë, Anita Thuludhar, dhe përfaqësuesin e përhershëm i FMN në Tiranë, Jens Reinke. Gjatë takimit, përfaqësuesit e FMN shprehën vlerësimet e tyre për rolin e opozitës në mbikëqyrjen dhe kontrollin e qeverisë gjatë katër viteve të shkuara.

Teksa falenderoi FMN-në për bashkëpunimin, Basha i infomoi në lidhje me raportin e OSBE-ODIHR. Sipas kryedemokratit, blerja e votës, përdorimi i burimeve publike, presioni mbi votuesit fatkeqësisht vazhdojnë dhe mbeten problemet kryesore që shoqëruan procesin zgjedhor.

?Kjo krizë në këtë fillim të legjislaturës shoqërohet dhe nga shqetësimet për situatën ekonomike ku niveli i lartë i borxhit, në 71% të PBB së bashku me nivelet e ulëta të mbledhjes së të ardhurave, janë duke ndikuar në të gjithë treguesit e tjerë ekonomikë. Papunësia ndër të rinjtë vazhdon të mbetet e lartë, dhe biznesi ka tkurrur veprimtarinë e tij duke mos marrë vendime për zgjerim. Kjo, e shoqëruar me një nivel shumë të ulët të investimeve të huaja, bëjnë të mundur që sektori privat të mos jetë më punëdhënës me kërkesë të lartë?, u shpreh Basha.

Lulzim Basha bëri me dije se numri i madh i të larguarve nga Shqipëria është treguesi kryesor i ekonomisë të ulët në vend.

?Numri i të larguarve nga Shqipëria prej rreth 270 000 vetësh është treguesi kryesor që ekonomia po lëngon, dhe fatkeqësisht nuk ka asnjë perspektivë pozitive në horizont. Politikat e ngrirjes së pagave dhe rritjes së ulët të pensioneve kanë shkaktuar në rastin më të mirë mosngritje të fuqisë blerëse, dhe një pjesë e madhe e personave me të ardhura të ulta kanë vërejtur ulje të konsumit?, vazhdoi ai.

Një pikë tjetër e diskutimit ishin edhe investimet publike, ku Basha u shpreh se në këtë drejtim qeveria Rama ka dështuar, pasi disa akse kryesore sot janë akoma të papërfunduara, dhe niveli i tyre është në minimumin historik të 10 viteve të fundit.

Më tej kryetari i PD-së, Lulzim basha u ndal edhe tek klima e biznesin në vend për të cilin fushata kundër informalitetit është shumë shqetësuese për shkak të taksave të larta, nga sistemi i komplikuar fiskal dhe nga burokracia dhe korrupsioni që vjen nga nivele të larta.

?Shqetësues është dhe projekti i 1 miliardë Euro koncesione që qeveria ka lançuar, ku do të kemi përqëndrim të fondeve publike dhe në më pak duar, por ajo që është akoma më shqetësuese është ndikimi që do të ketë tek borxhi publik?, shprehet Basha.

Ai tha se në këto kushte, Partia Demokratike do të mbështesë një program tjetër me FMN-në ku kontrolli është i nevojshëm të jetë akoma dhe më i fortë për shkak të gjendjes ekonomike dhe të balancave fiskale me projektin korruptiv të koncesioneve.

Droga dhe krimi i organizuar janë kthyer në një kërcënim për sigurinë kombëtare dhe po kriminalizojnë me shpejtësi segmente të caktuara të ekonomisë dhe financave të vendit.

Në përfundim të fjalës së tij Basha tha se Partia Demokratike do të vazhdojë të propozojë zgjidhje konkrete dhe mbetet e vendosur për të denoncuar aferat korruptive./CityNews