Meta destabilizon Ramën

15 Nëntor 2016, 11:31, Aktualitet CNA

Ngjarjet e qershorit dhe korrikut të këtij viti, kur Qeveria u trondit fort për shkak të lëvizjeve destabilizuese të LSI-së, duket se janë rikthyer në skenën politike. Ilir Meta si një mjeshtër i madh i llogaritjes së numrave, duke parë revanshin e Edi Ramës, ka rifilluar të kthejë në treg skemat e tij të cilat janë vetëm llogaritje për të rrëzuar Edi Ramën nga posti i Kryeministrit.

Sot, Kryeministri i vendit ka më pak deputetë se kurrë, zyrtarisht i ka ikur Ben Blushi dhe Mimoza Hafizi të cilët kanë deklaruar se do të votonin në çdo moment për rrëzimin e Kryeministrit Edi Rama.

Opozita dhe Basha nga ana e tij, kanë qenë të qartë në kërkesat e tyre publike, që çdo forcë politike të bashkohej në një koalicion të madh për të larguar kryeministrin që e mbuloi vendin me kanabis.

Basha është i pafuqishëm pasi të gjithë skenarët luhen tashmë nga Meta. Ky i fundit është njeriu që me një lëvizje mund ta çonte Edi Ramën në opozitë, por edhe ta sillte Bashën në pushtet. Meta është i qartë, ai është faktori kryesor, dhe në çdo moment luan për të rritur vlerat e LSI-së dhe vetes së tij në arenën politike. Aktualisht PS dhe PDIU nuk kanë më shumë se 67 deputetë, por Rama ka ?delfinët e tij? brenda Parlamentit, numra të cilët Meta i llogarit çdo ditë, siç ndodhi në qershor dhe korrik, ku u tentua rrëzimi i Qeverisë, por gjithçka u bllokua nga lëvizjet e çameve të PDIU dhe të vetë disa deputetëve të Metës, të cilët flirtonin me Ramën.

Sot, Ilir Meta i është rikthyer prapë llogarive dhe lëvizjeve të tij për ta destabilizuar Ramën. Lëvizjet e tij e dobësojnë çdo ditë e më shumë PS-në dhe Kreun e Qeverisë. Megjithëse forca e dytë kryesore në qeverisje, që është LSI, nuk ka marrë asnjë kosto për keqqeverisjen e vendit këto gati 4 vite. Meta po vepron në çdo moment kundër shumë linjave zyrtare të Ramës. Në fakt ai përpiqet të mbajë qëndrim të ndryshëm për çështje delikate, disa herë edhe kundër Ramës, duke tentuar t?ju largohet kostove politike që vijnë nga një Qeverisje e fortë dhe me reforma që mund të shkaktojmë probleme sociale.

Meta është duke llogaritur numrat për të bërë të mundur që në zgjedhjet e vitit 2017, minimalisht të shkohet pa Sajmir Tahirin si Ministër të Brendshëm. Por mrekullia e tij do të ishte që të krijonte një qeveri me bazë të gjerë, me aleanca deputetësh të PS-së dhe njerëz të pakënaqur nga Rama, të cilët mund të flirtonin për të rrëzuar Ramën, duke shkuar në gjirin e Metës, jo vetëm për disa muaj qeverisje, por edhe si deputetë me vende të sigurta në zgjedhjet e ardhshme. Lulëzimi i Ramës do të thoshte se Meta do të dilte më vete me një koalicion të tijin në zgjedhjet e ardhshme, por nga ana tjetër, ai llogarit mandatet që fiton brenda koalicionit me Ramën, dhe si i vetëm në gare. Meta është i qartë dhe e di mirë se sa ?i vlen lëkura?.