Digjet gomonia me droge në Karaburun/Policia jep detaje

15 Nëntor 2016, 12:49, Aktualitet CNA

Policia Kufitare ka dhënë detaje mbi ngjarjen e ndodhur ditën e djeshme, ku një gomone, e cila dyshohej se po transportonte drogë, ka marrë flakë.
Ditën e djeshme mbi bazën e informacioneve të marra më parë, efektivët e Policisë Kufitare të Vlorës nisën një operacion gjatë natës së datës 13 Nëntor dhe paradites së datës 14 Nëntor. Mjetet detare të Policisë Kufitare Vlorë e Dhërmi dhe të Guardia di Finanza-s, janë vënë në ndjekje të mjetit lundrues.

Gjatë mesditës së datës 14 Nëntor Shërbimet e Policisë Kufitare të Stacionit Dhërmi kanë konstatuar në sektorin Rrugët e bardha -Gjiri Gramës, në vendin e quajtur “Gjiri Shën Andreas”, Karaburun në breg, një mjet lundrues tip gomone, i cili po digjej dhe në afërsi të tij disa qese dhe thasë plastmasi.

Menjëherë nga DVKM Vlorë, u morën masa dhe me mbështetjen e D.V.P. Vlorë dhe Delta Force dhe Guardia di Finanza, u ushtruan kontrolle nga deti dhe toka për personat që dispononin këtë mjet lundrues dhe që i kishin vënë flakën për t’i shpëtuar Policisë.

Nga veprimet e para të kryera nga grupi hetimor rezultoi se mjeti ishte tip gomone, me gjatësi 12 metra, me dy motorë të markës Mercury” me fuqi motorike 350hp i cili në pjesën fundore ishte i djegur plotësisht ndërsa në bordin e mjetit vazhdonte të digjej një lëndë e dyshuar si lëndë narkotike e llojit Cannabis Sativa.

Në vendin përreth gomones gjendej e përhapur dhe në thasë plastike lëndë e dyshuar Cannabis Sativa dhe qese plastike të ambalazhuara me mbishkrime në gjuhën Italiane.

Po gjatë kontrollit në një zonë të pyllëzuar u gjetën edhe disa pako të mëdha me lëndë narkotike.

Përreth vendit ku u konstatua gomonia si dhe në zonën e pyllëzuar u gjet dhe u sekuestrua rreth 224 kg lëndë narkotike.

Nga Policia po vijon krehja e zonës për kapjen e personave të dyshuar. Ndërkaq provat materiale të gjetura në vendngjarje u transportuan nga Mjeti i Delta Forcë dhe mjeti i Guardia di Finanza, për në Vlorë dhe ju kaluan për veprime të mëtejshme proceduriale Seksionit të Narkotikëve në D.V.P Vlorë.

Po punohet për identifikimin e mjetit lundrues dhe të autorëve të kryerjes së kësaj vepre penale.

Veprimet dhe verifikimet u bënë bashkë me Nuklin e Guardia di Finanza të Vlorës.