KLSH zbardh skandalet në UKT

24 Gusht 2016, 16:41, Aktualitet CNA

Raporti i fundit i Kontrollit të Lartë të Shtetit në ndërmarrjen e Ujësjellës Kanalizimeve në Tiranë zbardh abuzimet që janë bërë në këtë ndërmarrje. Raporti thekson se janë bërë punësime në shkelje të ligjit duke e mbingarkuar organikën e UKT në mënyrë fiktive në një kohë kur nuk është bërë asnjë këshillim apo studim për këtë. Madje aty thuhet se punësimet janë bërë pa pasur asnjë kriter në lidhje me pozicionin e punës, arsimit apo kualifikimet përkatëse, raporton gazeta SOT.

Gjithashtu raporti i KLSH thotë se abuzime masive janë bërë edhe me tenderat, për të cilat theksohet se shpesh herë është fshehur destinacioni apo funksioni i vërtetë i tyre, ndërsa në raste të tjera thuhet se nuk është kryer fare procedura e prokurimit. KLSH ka konstatuar se UKT nuk ka bërë asnjë analizë tekniko-financiare në lidhje me nevojat funksionale. Si pasojë e kësaj nuk ka patur një evidentim të saktë dhe objektiv në lidhje me sektorët apo vendet e punës të cilat duhet të suprimoheshin apo t?ju shkurtohej apo t?ju rritej fuqia punëtore. ?Rezulton se struktura organizative e shoqërisë veçanërisht ajo e aparatit të administratës është e mbingarkuar me burime njerëzore dhe në shumë sektorë vendet e punës janë të dubluar, ndërkohë në ndryshimet strukturore të cilat i janë propozuar Asamblesë së Përgjithshme të Aksionarëve konstatohet se ndryshimet në lidhje me administratën faktikisht konsistojnë në ndryshime emërtimesh të departamenteve ekzistuese, krijimi i drejtorisë task-forcë, ndërsa ndryshimet në njësitë zonale konsistojnë në uljen e numrit të faturuesve, uljen e numrit të hidraulikëve, shoferëve, teknikëve të ndryshëm si pompist, klorinues, saldator, mekanik, teknik bilanci, inxhinier matje, etj?, thuhet në raportin e KLSH-së.

Raporti thekson se në rastin e rekrutimeve UKT nuk ka kryer intervistimin apo testimin e të punësuarve, të cilët rezultojnë edhe me probleme në arsim. Po ashtu theksohet se ka edhe parregullsi në kontratat e punës, ku rezulton se ato nuk janë të firmosura në çdo faqe nga i punësuari. Sa u përket shpenzimeve, KLSH konstaton se : Nga auditimi i pagesave të bëra nëpërmjet arkës dhe bankës për blerjet e vogla, rezultoi se janë kryer pagesa duke mos plotësuar praktikën e gjithë dokumentacionit justifikues, si ofertat e marra nga operatorët ekonomik (minimalisht 3 oferta), fletë hyrjen në magazinë, aktin e marrjes në dorëzim nga komisioni i ngritur për këtë qëllim, urdhri i prokurimit, në kundërshtim me udhëzimin përkatës.