Nga Kastriot MYFTARAJ/Akreditimi i Universitetit të Çilit në Tiranë, si Universiteti i Çernobilit

27 Maj 2016, 07:03, Aktualitet CNA

Këto ditë qeveria mori vendim që akreditimi i universiteteve që në letër do të kryhet nga një kompani britanike, të nisë me katër universitete publike dhe dy universitete private, nga të cilët njëri është universiteti në pronësi të Henri Çilit, i njohur si Universiteti Europian i Tiranës, por që meriton të quhet Universiteti i Çernobilit në Tiranë. Për ata të cilët e kanë harruar Çernobili është vendi në Bashkimin Sovjetik ku gjendej reaktori bërthamor, i cili pati një shpërthim që shkaktoi përhapjen e rrezeatimit radioaktiv në krejt Europën.

Arsyeja që universiteti i Çilit meriton emrin Universiteti i Çernobilit, është se burri i shkathët Henri Çili, pasi e fitoi licencën e universitetit si dhuratë nga Berisha, sapo ai u bë Kryeministër në 2005, tashmë po e fiton akreditimin si dhuratë nga Rama, për shkak Çili ka bërë prorektor në UET babain i bashkëpunëtorit të ngushtë të Ramës, Endri Fugës, Përparim Fugën.

Një emërim ky që nuk ka shpjegim tjetër përveç fitimit të simpatisë kryeministrore, pasi Përparim Fuga është profesor në fizikë, dhe specialist në fizikën bërthamore dhe në UET nuk ka një departament të fizikës, aq më pak të asaj bërthamore. Përparim Fuga ligjëron në UET për sigurinë kombëtare dhe statistikën, ndonëse ai nuk ka asnjë specializim për këto lëndë.

Nëse do të kërkohej një lidhje qoftë edhe përsëlargu e profesor Përparim Fugës me ekspertizën e çështjeve të sigurisë kombëtare, kjo do të datonte në vitin e largët 1986, në kohën e shpërthimit të Çernobilit. Atëherë në ndërkohë që e gjithë Europa ndaloi konsumin e prodhimeve ushqimore të atij viti, si të rrezikshme për shkak të rrezeatimit bërthamor, diktatura komuniste mashtroi shqiptarët duke iu thënë se në prodhimet bujqësore dhe blegtorale në vend nuk kishte rrezeatim radioaktiv dhe se nuk përbënin rrezik për t? u konsumuar, madje edhe nga fëmijët. Kjo u bë pasi nënshkruan një raport të rremë disa fizikanë të njohur ndër ta edhe professor Përparim Fuga. Madje këta nënshkruan edhe një raport që mundësoi blerjen e shumë prodhimeve bujqësore dhe blegtorale nga shtete të tjerë që do t? i shkatërronin ato. Kjo blerje u mundësua pasi një grup fizikanësh nënshkruan një raport ku thuhej se te këto prodhime shkalla e rrezeatimit ishte shumë e ulët, e papërfillshme.

Pasi emri i profesor Përparim Fugës u përdor për të çertifikuar, për aq sa mund ta besonte kush në atë kohë, prodhimet bujqësore e blegtorale të prekur nga rrezeatimi i Çernobilit, kuptohet se ky zotëri nuk e ka për gjë që emri i tij përdoret për akreditimin e universitetit të Çilit. Aq më tepër kur paguhet mirë për këtë gjë. Veçse pas kësaj, universiteti e meriton të quhet Universiteti i Çernobilit në Tiranë. Tekefundit kështu emri do të përafrohej me atë që njihet publikisht, pasi UET-në të gjithë e quajnë Universiteti i Çilit./Shkruar per citynews