Fitim monopolistik në kurriz të gjimnazistëve !

21 Shtator 2015, 17:47, Opinione CNA

Nga Artan FUGA

Ideja që lobia private po përgatit për ta bërë të detyrueshëm vetëm arsimin e mesëm të përgjithshëm, kundër çdo lloji tjetër arsimimi, do të ishte një grusht tjetër në ballë dhe në bark të arsimit tonë kombëtar dhe të jetës e nivelit kulturor të rinisë shqiptare.

Lubia ka marrë hov këtë javë.

Mblidhen edhe nëpunës të administratës dhe bombardohen me propagandë, duke u detyruar të shkelin me të dy këmbët, të dy duart, me kokë e këmbë, etikën e nëpunësit publik apo të punonjësit të sektorit publik.

Nuk di se kush i ka paguar shpenzimet e udhëtimit të tyre dhe të tjera…Uroj që të mos jetë privati që paguan punonjësit publikë…

Ideja platformë :

E para, zhduk diversitetin që shoqëria ka për detyrë t’i propozojë rinisë në arsimimin, duke fshirë cdo gjurmë profesionalizimi në arsimin e mesëm, dhe bërë të detyrueshëm gjimnazin e përgjithshëm, ideologjik, si dikur detyrimin për të punuar në minierë.

E dyta, nënkupton pastaj strategjinë, që vjen më pas, parapërgatiten hapat e ardhshëm për t’u hapur në gjimnaze të përgjithshëm privatë, pronësuar nga të njejtat kompani private, duke krijuar zgjatime metastazike nga arsimi i lartë në atë të mesmin. Kështu krijohen monopole duke përfituar nga fakti se ligja për arsim e këndim nuk parashikon asgjë kundër monopeleve dhe koncentrimit të pronës, sikurse ndodh në botë. Kompania kap arsimin e lartë, të mesëm, pastaj edhe media, prona të paluejtshme dhe askush nuk i thotë askujt : Stop sepse po shkel ligjet e konkurrencës. Autoriteti i konkurrëncës fle gjumë, se çfarë të bëjë??? O do bëjë sikur fle ose do t’a fusin në hipnozë, ose…

E treta, pastaj do t’i propozohet gjimnazistëve të shkollave të mesme të kompanisë që të vijnë në shkollën e lartë të kompanisë, universitet që edhe ky do të jetë i përgjithshëm sikurse janë universitetet shqiptare në rastet dërmuese.

A nuk po krijohen zinxhira kalimesh të detyrueshme nga shkolla vjeçare, te gjimnazet te shkollat e larta të së njejtës kompani !

Prisni, prisni se çfarë do ju shohin sitë!

Universitet i përgjithshëm që gjoja përgatit jurista, filozofa, sociologa, politikana pa zanat e që nuk dinë të lidhin as rripat e këpucëve, spektatorë dhe jo bërës, nuk jep akses as në zanat e as në tregun e punës, është më fitimprurësi, pa kosto, me fitim të lartë, dhe më i dobti. Shiten pastaj diploma, por ato diploma nuk kanë veçse vlerë zero në treg.

Fitim i lartë, mjafton të mos kenë konkurrentë në treg. Si të mos ketë konkurentë??? I mbyllim konkurrentët sepse gjoja u gjejmë defekte administrative, si edhe godasim me shqelma, shpulla, sharje, copa dërrasash, shkollën publike që ajo të degjenerojë deri në atë mikë sa të jetë veçse një hap larg kopshtit zoologjik.

Ja se çfarë fshihet pas idesë lobuese-lubi që edhe arsimi i mesëm i përgjithshëm të jetë i vetmi lloj arsimi i detyrueshëm duke fshirë të tjerët që duhen rinovuar, forcuar e rinovuar dhe jo lënë si derimësot, si shkolla bashkimesh profesionale të kohës të Molotovit.