web counter
LEXO PA REKLAMA!

SHKARKO APP

App Store
Google Play

Më shumë para nga Banka e Shqipërisë

24 Mars 2015, 20:45, Ekonomi CNA

Banka e Shqipërisë rriti në tremujorin e fundit 2014 sasinë e likuiditetit të injektuar në treg, në funksion të politikës monetare lehtësuese për nxitjen e ekonomisë.
Sipas informacionit të bankës, në tremujorin e fundit 2014 u injektuan në treg mesatarisht 28.2 miliardë lekë, në rritje me 76% ndaj të njëjtës periudhë të një viti më parë. Për injektimin e likuiditetit të përkohshëm në tremujorin e fundit të vitit, Banka e Shqipërisë përdori instrumentin e saj kryesor, marrëveshjen e anasjelltë të riblerjes me maturim njëjavor, mesatarisht 23.68 miliardë lekë në javë, shoqëruar njëkohësisht me marrëveshje të anasjelltë riblerjeje me maturim njëmujor, mesatarisht 2.45 miliardë lekë në javë.
Sasia më e madhe e likuiditetit të hedhur në treg nga Banka Qendrore tregon se sistemi bankar në vend ka thithur më shumë para, duke shfaqur një qëndrim më aktiv në biznesin e vet. Gjatë tremujorit të fundit të vitit 2014 Banka e Shqipërisë ka vijuar me operacionet për të rregulluar zotërimin e bonove të thesarit në jo më shumë se niveli 70% i totalit të çdo emetimi.
Në tremujorin e fundit, janë realizuar tre ankande për shitje me të drejta të plota të bonove 6-mujore, duke ulur zotërimin në këto letra në total për 220 milionë lekë, ndërkohë që u zhvillua edhe një ankand për blerje bono thesari 12-mujore të sapoemetuara, me shumë të shpallur 100 milionë lekë.
Portofoli i bonove të Bankës së Shqipërisë në fund të vitit 2014 rezulton të jetë 35 milionë lekë më i ulët se një vit më parë, ndërsa, në vlera relative, Banka e Shqipërisë zotëron 11.26% të totalit të borxhit të brendshëm, nga 12.27% që zotëronte në fund të vitit 2013. Në tremujorin e fundit të vitit të kaluar, Banka e Shqipërisë zhvilloi gjithashtu një ankand për rritjen e vlerës së rezervës valutore dhe bleu në total rreth 10.3 milionë euro.





Lajmet e fundit nga