E fundit!

17:34 Politikë

Rama pret në takim Presidentin e Lituanisë/ Zbardhen diskutimet

Kryeministri Edi Rama ka pritur ditën e sotme në një takim...

Të ardhurat në buxhet bien me 1.3%

24 Mars 2015, 07:53, Ekonomi CNA

Financat kanë vijuar me performancën negative të të ardhurave edhe gjatë muajit shkurt. Sipas statistikave fiskale paraprake të publikuara nga Ministria e Financave, për 2 mujorin 2015, të ardhurat totale në buxhet ishin 52.57 miliardë lekë, apo 1.3% më pak se një vit më parë, ndërsa në shkurt 2015, në buxhet u mblodhën 26 miliardë lekë, nga 26.4 miliardë lekë në janar.
Në janar 2015, të ardhurat totale në buxhet ranë me 4.6% me bazë vjetore, sipas statistikave të rishikuara fiskale të Ministrisë së Financave. Ministri I Financave kishte deklaruar pak kohë më parë në një takim informal me mediat se kjo situatë ishte e pritshme për janarin dhe për shkurtin, për shkak të vënies në zbatim të sistemit të ri online të deklarimit të taksave dhe rendimenti I mbledhjes së të ardhurave do të përshpejtohet në muajt në vijim. Kjo ka bërë që financat të vendosin dhe një plan më të ulët për janarin dhe shkurtin, çka bën që ata të jenë brenda planifikimeve. Nga ana tjetër, një factor që po ndikon negativisht janë dhe çmimet e ulëta të naftës së importuar.
Të ardhurat nga TVSH për dy mujorin ishin 18.9 miliardë lekë, duke shënuar një rënie prej 1.4%. Megjithatë, financat në tabelat e tyre fiskale raportojnë dy vlera për TVSH-në e mbledhur në janar-shkurt 2014 (18.3 miliardë lekë në statistikat fiskale të shkurtit 2014 dhe 19.2 miliardë lekë në treguesit fiskal të buxhetit të konsoliduar për vitin 2014, progresiv për çdo muaj-për referencë është marrë kjo e fundit, pasi është publikimi më i fundit në kohë). Kjo shifër në fakt ndryshon dhe tendencën e të ardhurave në total. Në rast se merret për referencë shifra e shkurtit 2014 për TVSH-në, rezulton se të ardhurat në total për janar-shkurt 2015 janë rritur me 0.33%.
Të ardhurat nga tatim fitimi ishin 2.05 miliardë lekë, me një rënie prej 13% me bazë vjetore për dy mujorin. Megjithatë ritmet e rënies janë ngadalësuar, teksa në janar ato ranë me 61%. Financat kanë shpjeguar se shkak për këtë rënie ishte pamundësia e shkarkimit të deklaratave nga biznesi, si rrjedhojë e vënies në funksion të sistemit të ri online. Të ardhurat nga akciza ishin 4.3 miliardë lekë, me një rritje me bazë vjetore prej 20%. Të hyrat nga tatimi mbi të ardhurat personale ranë me 12.6 miliardë lekë për 2 mujorin, në rreth 4 miliardë lekë.