AIDA, një fond i veçantë për financimin e biznesit femëror

24 Mars 2015, 11:23, Ekonomi CNA

Agjencia Shqiptare e Zhvillimit të Investimeve (AIDA) ka nisur zbatimin e 5 programeve me fonde të menaxhuara prej saj në ndihmë të bizneseve vendase, të cilat kanë nisur aplikimet ku risi përbëjnë dy fonde të reja: Fondi i Subvencionimit të Interesave të Kredive për Gratë Sipërmarrese dhe Fondi Shqiptar në mbështetje të Sipërmarrjeve të reja ?Start-up?.

Burime të AIDA-s bëjnë të ditur se programet si Fondi i Konkurrueshmërisë, Fondi i Inovacionit, Fondi i Ekonomisë Kreative, Fondi i Subvencionit të Interesave të Kredive për Gratë Sipërmarrëse dhe Fondi Start-Up po vijojnë sivjet pas eksperiencës së suksesshme të krijuar nga menaxhimi i fonedeve që Qeveria vuri vjet në shërbim të biznesit vendas.

Fondi i Subvencionit të Interesave të Kredive për Gratë Sipërmarrëse synon të kontribuojë në rritjen ekonomike të sipërmarrjeve femërore duke nxitur investimet e reja nëpërmjet rritjes se financimeve nga institucionet financiare jo bankare dhe shoqëritë e kursim-kreditit, që parashikohen të arrijnë shumën prej 26,5 milionë lekë.

Parashikohet që në një periudhe 4-vjeçare të përfitojnë më shumë se 500 biznese, duke mundësuar rritje ekonomike të qëndrueshme dhe vende të reja pune. Fondi parashikon pagesën e 50% të shpenzimeve të normës së interesit të kredive të biznesit për gratë sipërmarrëse, për një periudhë 4-vjeçare, që do të përdoren për investime në biznes. Përfituese do të jenë ndërmarrjet e klasifikuara si biznese mikro, të vogla dhe të mesme të drejtuara nga gratë.

Fondi i Konkurrueshmërisë që menaxhohet nga AIDA synon përmirësimin e kapaciteteve të sipërmarrësve shqiptarë në mënyrë që të jenë në gjendje t?u përgjigjen kërkesave të tregut ndërkombëtar si dhe për të rritur punësimin. AIDA me shumën prej 20 milionë lekë me Fondin Shqiptar të Konkurueshmërisë, financon një Skemë Granti për Ndarje të Kostove në ndihmë të sipërmarrësve eksportues dhe përpjekjeve të tyre për të konkuruar në tregun e huaj.

Fondi i Konkurrueshmërise jep grante deri në 1.000.000 lekë dhe mbulon vetëm 70% të kostove të angazhuara, thonë burimet e AIDA-s. ?Aplikimet nga ndërmarrjet e vogla dhe të mesme për këtë fond do të vijojnë deri në Nëntor?, thanë ato.
Fondi i Inovacionit u jep ndihmë në formë subvencioni të drejtpërdrejtë SME-ve me shuma deri në 400.000 lekë dhe në varësi të vlerësimit për projektin, skema mbulon nga 30%- 50% të kostove të pranueshme për auditimin e Inovacionit dhe Teknologjisë dhe teknologjinë Ndërkombëtare.

Fondi i Ekonomisë Kreative synon zhvillimin e sektorit të artizanatit dhe zejtarisë në Shqipëri, duke krijuar mjedis të favorshëm për aktivitete më të qëndrueshme ekonomike dhe krijimin e vendeve të punës. ?Buxheti i planifikuar për vitin 2015 për këtë fond është 500,000 lekë për projekt?, thanë burimet e AIDA-s. Vjet AIDA asistoi me fonde sektorin e ekonomisë kreative, ku përfituan 13 biznese në fushën e artizanatit, 19 biznese të tjera nga fondi i konkurrueshmërisë në fushën e certifikimit me standardet ISO 9001, HACCP , OHSAS 18001 etj.