E fundit!

19:37 Aktualitet

Mbahet protesta e 25-të kundër qeverisë, qytetarët ‘sfidojnë’ shiun

Këtë të mërkurë ka nisur grumbullimi i qytetarëve për prot...

Pse kaq shumë zhurmë për telefonin e ri të Huaweit?

2 Shtator 2023, 22:54, Tech CNA

Nxjerrja e befasishme në treg e telefonit të ri nga gjiganti teknologjik kinez Huawei ka marrë vëmendje ndërkombëtare rreth asaj se çfarë përmban.

Kompania, e cila është shënjestruar me sanksione nga Shtetet e Bashkuara, ka nisur ta shesë telefonin më të ri Mate 60 Pro për 964 dollarë, prej të martës, duke nxitur pikëpyetje rreth vendimit të saj pse nuk ka bërë reklamim paraprak të pajisjes.

Pyetje ka edhe nëse pajisja mbështet gjeneratën e pestë të komunikimeve (5G).

Gjenerata 5G u mundëson konsumatorëve lidhje më të shpejta në internet.

Prej vitit 2019, Shtetet e Bashkuara ia kanë ndaluar Huaweit qasjen në pajisjet thelbësore për prodhim të modeleve të avancuara teknologjike – kryesisht çipa - prandaj kompania ka arritur të shesë vetëm sasi të kufizuara të pajisjeve me teknologjinë 5G, duke i shfrytëzuar rezervat e fundit.

Shtetet e Bashkuara dhe disa shtete evropiane e konsiderojnë Huawein si rrezik për sigurinë.

Kompania kineze, në anën tjetër, hedh poshtë këto pretendime.

Kufizimet amerikane e kanë dëmtuar biznesin e kompanisë, e cila dikur ka garuar me gjigantët si Apple dh Samsung.

Mirëpo Huawei ka thënë vazhdimisht se është duke punuar në rikthim, dhe disa kompani kërkimore i kanë thënë agjencisë së lajmeve Reuters në korrik, se besojnë se Huawei po bën plane për t’iu kthyer industrisë së telefonave me kapacitet 5G deri në fund të këtij viti, duke i përdorur çipat e prodhuar nga një kompani vendore.

Nëse Huawei dhe Kina arrijnë t’i prodhojnë vetë çipat për teknologjinë 5G, diçka e tillë do të përbënte avancim të madh të kapaciteteve të tyre krahas përpjekjeve amerikane për t’ia kufizuar përparimin kësaj kompanie.

Huawei nuk është deklaruar, por ka thënë se pajisja e re është “modeli Mate më i fuqishëm ndonjëherë”.

Blerësit e telefonit kanë publikuar video në rrjetet sociale që sugjerojnë se Mate 60 Pro mund të shkarkojë video me shpejtësi të telefonave 5G, duke sugjeruar se i përket kategorisë së njëjtë.

Telefoni përmban një procesor Kirin 9000, nga departamenti për çipa i Huaweit, i cili duket se e ka shfrytëzuar teknologjinë e avancuar nga një kompani vendore në Kinë.

Lansimi i telefonit i ka shtyrë kompanitë në gjithë botën që ta kenë atë sa më shpejt në duar për ta parë se çfarë ka brenda.

Sasia fillestare është shitur shpejt online.

Kompania bazë e Huaweit në Shenzhen dhe faqja e saj online, kanë bërë të ditur se sasitë e radhës do të mund të blihen nga mesi i shtatorit.

Tabloidi kinez i përkrahur nga shteti Global Time, ka raportuar me mburrje, duke thënë se telefoni është lansuar teksa në Kinë realizon vizitë Sekretarja amerikan për Tregti, Gina Raimondo, dhe e ka konsideruar telefonin si dëshmi se SHBA-ja ka dështuar me “shtypjen ekstreme ndaj Kinës”.

Mediat shtetërore kineze nuk kanë ofruar dëshmi për t’i mbështetur këto pretendime.

Shumë pjesëtarë të stafit të Huaweit kanë thënë se lansimi i telefonit ka qenë befasi edhe për ta, pasi planet kanë qenë për lansim më 12 shtator.

Nicole Peng, nga kompania Canalys, ka thënë se është tejet e rëndësishme që Huawei të ofrojë informacione për teknologjinë e përdorur, marrë parasysh interesimin në treg./ REL