Ismajli largohet nga Serie A? Klubi i njohur përgatit ofertën

3 Shkurt 2025, 18:25, Sport CNA

E ardhmja e mbrojtësit të Kombëtares, Ardian Ismajli ka mbetur ende e paqartë. Me kontratën e tij me Empolin që skadon në fund të këtij sezoni, interesi për 28-vjeçarin është rritur ndjeshëm, me klube të mëdha që kërkojnë shërbimet e tij.

Së fundmi, në garë për të ka hyrë edhe Galatasaray, klubi i madh turk, i cili dëshiron të përforcojë repartin e mbrojtjes përpara mbylljes së merkatos më 11 shkurt. Ky interes ka krijuar shqetësim tek Napoli, që e ndjek mbrojtësin shqiptar prej muajsh dhe ka si objektiv ta transferojë me parametra zero në verë. Por nëse turqit bëjnë një ofertë të parefuzueshme, atëherë planet mund të ndryshojnë për Ismajlin.

Sipas medias turke “Telegraf”, Galatasaray ka ndjekur prej kohësh paraqitjet e Ismajlit dhe e sheh atë si një përforcim të rëndësishëm në mbrojtje. Klubi nga Stambolli po përgatit një ofertë konkrete për ta marrë që në këtë merkato dimri, duke përfituar nga fakti se Empoli mund të pranojë një shitje të menjëhershme për të mos e humbur falas në verë.

Nevoja për një mbrojtës cilësor në radhët e kampionëve të Turqisë është e madhe, sidomos pasi Viktor Nelson pritet të largohet. Prandaj, afrimi i një lojtari me përvojën e Ismajlit shihet si opsioni ideal për të mbushur boshllëkun në repartin difensiv.

Ndërkohë, interesi i Napolit për mbrojtësin shqiptar nuk është i ri. Skuadra e Kontes e ka vëzhguar Ismajlin për një kohë të gjatë dhe e sheh atë si një investim të rëndësishëm për sezonin e ardhshëm.

Napolitanët e kanë vlerësuar performancën e tij te Empoli, ku këtë sezon në Serie A ka luajtur 23 ndeshje, me një total prej 1970 minutash. Përveç qëndrueshmërisë në mbrojtje, ai ka treguar aftësi të mira edhe në lojën ajrore dhe organizimin e fazës difensive.

Në planet e Napolit, Ismajli do të vinte si lojtar i lirë në verë, por një ofertë e fortë nga turqit tani mund t’ua prishë skemat.

Lojtari është i vetëdijshëm për situatën dhe është duke shqyrtuar ofertat. Në Turqi aktivizohen edhe shumë futbollistë të tjerë të Kombëtares Shqiptare, si Ernest Muçi, Rey Manaj, Arlind Ajeti, Taulant Seferi dhe Valon Ethemi.