E fundit!

12:08 Aktualitet

Protestat/ Rama: Askush nuk mund ta ndalë rrugën e Shqipërisë drejt BE-së

Kryeministri Edi Rama në një intervistë të dhënë për gazet...

Arrihet marrëveshja, Rashford bëhet me skuadër të re

2 Shkurt 2025, 17:22, Sport CNA

Pas shumë muajsh spekulimesh për të ardhmen e tij, Marcus Rashford do të nisë një kapitull të ri në karrierën e tij. Sulmuesi anglez ka arritur një marrëveshje me Aston Villa-n dhe pasi t’i nënshtrohet testeve mjekësore, do të bashkohet me skuadrën e Unai Emery. Kjo lëvizje do të ndodhë fillimisht në formë huazimi, por me një opsion blerjeje që mund të konkretizohet në fund të sezonit.

Transferimi vjen në një moment të rëndësishëm për Rashford, i cili ka kaluar një sezon të vështirë me Manchester United. Pas një edicioni fantastik në 2022/2023, ku shënoi mbi 30 gola në të gjitha garat, forma e tij ka rënë ndjeshëm këtë sezon. Kritikat për paraqitjet e tij dhe dyshimet mbi angazhimin e tij në fushë bënë që United dhe trajneri të shqyrtojnë opsionin e largimit të tij, të paktën përkohësisht.

Rashford kishte disa opsione për të ardhmen e tij. Barcelona, Milan dhe Borussia Dortmund ishin ndër klubet që kishin shprehur interes për të, por Aston Vila doli si zgjedhja më e arsyeshme. Barcelona, pavarësisht interesit të madh, nuk ishte në gjendje të krijonte hapësirë financiare për të siguruar shërbimet e tij.

Për Aston Villa-n, kjo është një lëvizje e rëndësishme që tregon ambiciet e klubit për të qëndruar në garën për një vend në top katërshen e Premier Ligë. Me ekipin që ka bërë një sezon të shkëlqyer deri tani nën drejtimin e Unai Emery, shtimi i një lojtari si Rashford mund t’i japë një shtysë të madhe në pjesën e mbetur të sezonit. Ai është një sulmues me eksperiencë të madhe në Premier Ligë dhe, kur është në formën e tij më të mirë, është një nga lojtarët më të rrezikshëm në kampionat.

Marrëveshja mes dy klubeve parashikon që Rashford të kalojë te Aston Villa fillimisht si huazim deri në fund të sezonit. Klubi nga Birmingham do të paguajë një pjesë të konsiderueshme të pagës së tij gjatë periudhës së huazimit, ndërsa ka siguruar edhe një opsion blerjeje për 40 milionë paund.

Për Manchester Unitd, kjo lëvizje mund të shihet si një zgjidhje e përkohshme, por gjithashtu edhe si një mundësi për të parë nëse Rashford mund të rigjejë formën e tij më të mirë në një ambient të ri.

Sipas të gjitha gjasave, Rashford do të bëjë debutimin e tij me Aston Villa-n në ndeshjen e Kupës ndaj Tottenham javën e ardhshme. Ky do të jetë një test i rëndësishëm për të dhe një mundësi për të treguar se është ende një nga lojtarët më të rrezikshëm në Angli.