E fundit!

12:08 Aktualitet

Protestat/ Rama: Askush nuk mund ta ndalë rrugën e Shqipërisë drejt BE-së

Kryeministri Edi Rama në një intervistë të dhënë për gazet...

Neymar rikthehet te Santos: Nuk e kisha menduar...

1 Shkurt 2025, 15:02, Sport CNA

Pas një aventure të gjatë në futbollin evropian dhe një përvoje të shkurtër në Arabinë Saudite me Al Hilal, Neymar është rikthyer te Santos. Pas 12 vitesh, klubi brazilian mirëpret përsëri njërin prej lojtarëve më të mëdhenj në historinë e tij, një futbollist që jo vetëm që u rrit dhe u formua te Santos, por edhe i dhuroi klubit një nga momentet më të lavdishme në historinë e tij.

Ky rikthim ka qenë i papritur, madje edhe për vetë lojtarin. Në fjalët e tij të para, Neymar pranoi se nuk e kishte menduar një skenar të tillë disa muaj më parë.

“Në janar nuk e imagjinoja që do të kthehesha te Santos, apo të largohesha nga Al Hilal, kjo është e vërteta. Atje isha i lumtur, familja ime ishte e lumtur, isha përshtatur dhe doja të luaja. Ndodhën gjëra që më trishtuan dhe mora këtë vendim. Pastaj më erdhi kjo mundësi dhe nuk e mendova dy herë. Kam ende diçka për të bërë, një mision që duhet realizuar, që mendoj se është i fundit. Natyrisht, dua të kthehem edhe te përfaqësuesja braziliane”, tha Neymar .

Pasi u largua nga PSG-ja në verën e vitit 2023, Nejmar u bashkua me Al Hilal në Arabinë Saudite në një transferim që kushtoi afro 300 milionë euro, përfshirë pagën dhe tarifën e transferimit. Ky ishte një nga transferimet më të bujshme të futbollit modern, por për fat të keq, Neymar nuk arriti të justifikonte pritshmëritë për shkak të dëmtimeve të shumta.

Në total, ai u aktivizua vetëm në 7 ndeshje me Al Hilal, para se një dëmtim i rëndë të ndërpriste sezonin e tij. Kjo ishte një goditje e rëndë për të, pasi ai kishte shpresuar të luante një rol të rëndësishëm në rritjen e futbollit në Lindjen e Mesme. Pas zhgënjimit të madh, vendimi për t’u larguar nga Al Hilal ishte i pashmangshëm.

Në eksperiencën e tij të parë te Santos, Neymar ishte thjesht i jashtëzakonshëm. Në 225 ndeshje, ai shënoi 136 gola, një rekord i jashtëzakonshëm për një lojtar aq të ri. Kulmi i karrierës së tij te Santos ishte në vitin 2011, kur ai udhëhoqi skuadrën drejt triumfit në Kopa Libertadores, një trofe që klubi nuk e kishte fituar prej afro 50 vitesh. Pas triumfeve me Santos, Nejmar bëri hapin e madh në Europë, duke u transferuar te Barcelona në vitin 2013. Aty ai formoi një treshe sulmuese legjendare me Lionel Mesin dhe Luis Suárezin, duke fituar Ligën e Kampionëve në vitin 2015. Ai qëndroi në Katalunjë deri në verën e vitit 2017, kur PSG-ja pagoi klauzolën e tij të lirimit prej 222 milionë euro, duke e bërë atë lojtarin më të shtrenjtë në histori.

Në Paris, Neymar pati momente të shkëlqyera, por edhe shumë dëmtime që e penguan të arrinte potencialin e tij maksimal. Pavarësisht kësaj, ai ndihmoi PSG-në të fitonte tituj të shumtë në Francë dhe të arrinte finalen e Ligës së Kampionëve në vitin 2020. Nëse ai arrin të mbajë veten larg problemeve fizike dhe të luajë rregullisht, mund të bëjë një rikthim të madh dhe të ndihmojë Santosin të luftojë për tituj kombëtarë dhe ndërkombëtarë. Për më tepër, një sezon i suksesshëm mund ta rikthejë atë edhe në kombëtaren braziliane, për të synuar një Botëror tjetër.