web counter
LEXO PA REKLAMA!

SHKARKO APP

App Store
Google Play

E fundit!

x

Fonseca shërthen ndaj arbitrave pas humbjes, trajneri i Atalantës: Mos e bëni pis këtë fitore

7 Dhjetor 2024, 14:37, Sport CNA

Fonseca shërthen ndaj arbitrave pas humbjes, trajneri i Atalantës: Mos

Atalanta vazhdon të shkëlqejë në Serinë A, duke regjistruar fitoren e nëntë radhazi në kampionat. Skuadra nga Bergamo mposhti Milanin me rezultatin 2-1 në një ndeshje tejet të rëndësishme për të dyja palët. Pas një pjesë të parë të ekuilibruar, Atalanta dominoi pjesën e dytë, duke siguruar një fitore të merituar që e çon në krye të klasifikimit me 34 pikë, katër më shumë se ndjekësit.

Megjithatë, ndeshja nuk kaloi pa polemika. Pas përfundimit të saj, trajneri i Milanit, Paulo Fonseca, shpërtheu në akuza ndaj arbitrimit, duke theksuar se goli i parë i Atalantës ishte i pavlefshëm. Ai shprehu pakënaqësinë e tij për mënyrën se si është trajtuar skuadra e tij nga arbitrat këtë sezon.

“Gjithmonë kam heshtur, edhe kur të tjerët kanë folur. Megjithatë është e pamundur të heshtësh kur shikon golin e parë të Atalantës. Nuk ka dyshime për atë episod, duhej anuluar. E di që të jesh arbitër është një punë e vështirë, por jam i lodhur duke parë gjithmonë të njëjtat gjëra. Asnjë respekt ndaj nesh.

Nuk kam frikë të them të vërtetën. Gjithmonë kam respektuar punën e gjyqtarëve, por çdo javë ndodh e njëjta gjë. Gjithmonë ka mungesë respekti për Milanin. E fillojmë ndeshjen me një gol që duhej anuluar dhe kjo ndryshoi ndeshjen.”, deklaroi Fonseca.

Nga ana tjetër, trajneri i Atalantës, Gasperini u shpreh entuziast për serinë e shkëlqyer të rezultateve, duke e cilësuar fitoren si një sukses të merituar. Ndërsa sa i përket polemikave, theksoi se është një ndeshje që nuk duhet bërë pis.

“9 fitore radhazi është një seri e shkëlqyer. Është e vështirë për t’u arritur në një kampionat si Seria A. E arritëm në një mënyrë absolutisht të merituar. Sa i përket numrave, ne ishim superiorë. Nuk u kënaqëm asnjëherë, kurrë nuk u përpoqëm të humbnim kohën. Nuk është një ndeshje që mund të bëhet pis. Atalanta e meritoi fitoren.

Nuk mund të flasim për titullin kampion. Tifozët këndojnë për titullin kampion, sepse Atalanta nuk ka qenë kurrë në këtë pikë në muajin dhjetor. Lërini të këndojnë, tani është një shpërthim gëzimi, të cilin mund të mos e mendojmë më kurrë”, u shpreh Gasperini.

Pas kësaj humbje, Milani mbetet në vendin e shtatë me 22 pikë, ndërsa Atalanta kryeson kampionatin, duke synuar të vazhdojë formën e shkëlqyer edhe në javët në vazhdim.





Lajmet e fundit nga