Ekipi kombëtar, U-20 në basketboll për femra nis pregatitjet për ndeshjet finale të Kampionatit Europian

30 Qershor 2024, 17:35, Sport CNA

Ekipi kombëtar, U-20 në basketboll për femra nis pregatitjet

Ekipi kombëtar i basketbollit për femra, U-20

Qyteti i Pogradecit është zgjedhur nga ekipi kombëtar U-20 në basketboll për femra për të bërë fazën përgatitore. Prej ditës së hënë, vajzat e përzgjedhura në këtë ekip po përgatiten për ndeshjet finale të kampionatit Evropian që do të zhvillohet në Sofje të Bullgarisë. Klarent Dedaj, trajneri i ekipit tonë kombëtar U-20 ka treguar se të gjitha lojtaret vijnë nga ekipet e superligës dhe janë me cilësi mjaft të larta në lojë. Dedaj pranon se këto finale janë mjaft të vështira, sidomos kundër ekipeve që do të ndeshen në këtë kampionat, ndërsa është besimplotë se do të japin maksimumin për të përfaqësuar Shqipërinë sa më denjësisht.

"U-20 është grumbulluar në datën 24 qershor, për Europianin e moshës 20 vjeç në Sofje, Divizioni B. Ne e kemi Grupin C, me Greqinë, Belgjikën dhe Kroacinë. Ideja jonë është të japim më të mirën në basketbollin shqiptar, për nivelin që jemi deri tani. Do provojmë të luajmë në mënyrë dinjitoze dhe pse jo, të marrim maksimumin e vajzave. Vajzat janë të gjitha pjesëtare të ekipeve të rritura në kampionatin shqiptar dhe ekipeve të para të superligës së femrave. Atje luhet me renditje nga vendi i parë tek i 15-ti, ne do tentojmë të marrim maksimumin pa dhënë deklarata nëse do fitojmë apo jo. Kampionati nis në datën 6, ne do jemi në Sofje në 4 korrik, këto janë përgatitjet e fundit. Java që vjen janë 3 ditët e fundit."

Klarent Dedaj, Trajner i Kombëtares, U-20

Trajneri tregon edhe arsyen se pse zgjodhën që këtë fazë përgatitore ta zhvillonin në qytetin liqenor, duke shfrytëzuar rastin për të falënderuar edhe kryebashkiakun Xhakolli për mundësinë që i krijoi ekipit për t’u stërvitur në pallatin e sportit, tashmë të rinovuar dhe me kushte moderne.

"Ishte iniciativë e kryetarit të bashkisë, Ilir Xhakolli, që meqenëse ky pallat sporti u rinovua tashmë, pse mos ta zgjidhnim Pogradecin në një kohë vape. Këtu janë kushtet maksimalisht të mira për t'u stërvitur normalisht. E falënderoj publikisht zotin kryetar për këtë, për sigurimin e kushteve optimale. Jemi shumë të kënaqur këtu, të gjithë personat përgjegjës janë vënë në dispozicionin tonë, nuk kemi pasur asnjë problem. Më mirë nuk besoj se ka në asnjë vend tjetër."

Kapitenia e ekipit kombëtar U-20, Livia Gjata, tregon se në grupin që do të luajnë, ka shumë vështirësi për shkak të ekipeve shumë të mira kundërshtare, megjithatë ajo thotë se duke dhënë maksimumin, shpreson që të arrijnë rezultate të mira në këtë kampionat. Ndër ekipet kundërshtare, "frika" më e madhe mbetet kundrejt ekipit të Belgjikës, por për shkak të cilësive të mira të lojtareve të ekipit tonë, priten edhe rezultate dinjitoze.

Livia Gjata, kapitene e ekipit U-20

"Ne kemi që ditën e hënë që kemi filluar përgatitjet, me intensitet goxha të lartë. Jemi mirë, po japim maksimumin dhe besoj se jemi gati për të bërë një paraqitje sa më të mirë në kampionatin europian. Grupi që jemi është vërtet i vështirë, por ne po bëjmë shumë stërvitje dhe besoj do të bëjmë një paraqitje sa më dinjitoze për vendin tonë. Dua të falënderoj federatën që bëri të mundur të vijmë për t’u stërvitur në Pogradec, Bashkinë e Pogradecit që na hapi dyert dhe të gjithë sponsorët për akomodimin dhe ushqimin. Besoj se Belgjika ka rënë nga A-ja vjet dhe është një ekip pak i vështirë, por ne do të japim maksimumin për çdo ndeshje. Grupi është vërtet i mirë, jemi elementë shumë të mirë."

Në këto finale ekipi i vajzave të kombëtares është në Grupin C me Greqinë, Belgjikën dhe Kroacinë.

Kampionati Europian U-20 do të startojë në datën 6 Korrik në Sofje të Bullgarisë, ndërsa në këto finale, ekipi i vajzave të kombëtares shqiptare janë në Grupin C, me Greqinë, Belgjikën dhe Kroacinë. Shpresa për të dalë me rezultate të mira është në çdo lojtare të ekipit dhe stafit drejtues, pasi Kombëtarja U-20 ka në përbërje të saj, elementë mjaft të fortë të basketbollisteve./CNA