Zvicër-Itali/ Spalletti kujton Botërorin, Yakin: Kemi përgatitur edhe penalltitë

29 Qershor 2024, 12:30, Sport CNA

Zvicër-Itali/ Spalletti kujton Botërorin, Yakin: Kemi përgatitur

Italia dhe Zvicra përballen mes tyre, në ndeshjen e vlefshme për fazën e 1/8-ve në Europian.

Dy kombëtaret duan me çdo kusht kalimin në çerekfinale, ndërsa luhet vetëm për fitore. Do të jetë një ndeshje e luftuar, ashtu siç kanë qenë edhe në të kaluarën përballjet mes dy ekipeve.

Për Italinë, do të jetë një përballje e veçantë, pasi luhet në Berlin, aty ku në vitin 2006, fituan Botërorin.

Këtë moment e kujtoi edhe trajneri i axurëve, Luciano Spalletti, në konferencë për shtyp, duke thënë se ia ka kujtuar edhe lojtarëve.

“Të gjithë e mbajnë mend kur ne fituam Botërorin në Berlin në vitin 2006. Në stafin teknik ne kemi një legjendë si Bufon, që ua ka kujtuar të gjithëve atë moment. Ne e kemi përjetuar edhe njëherë gjithë emocionin që e kishim duke e parë edhe njëherë ndeshjen. Bastoni është në rregull. Ai u stërvit me ekipin dhe na lehtësoi pak situatën. Dimarko nuk është i gatshëm dhe nuk do të luajë. Ne duhet të bëjmë më shumë se çka kemi bërë deri tani, që të mund t’i bëjmë italianët krenarë. Shorti na vuri në një grup të vështirë dhe lojtarët nuk u përshtatën. Tani pres t’i shoh lojtarët më të relaksuar sepse është një ndeshje me eliminim direkt. Nuk ka justifikime, koha për të bërë diçka, është tani. Ne vetëm do të shkojmë në raundin tjetër nëse e fitojmë sfidën.”, tha Spalletti.

Në krahun tjetër, trajneri i Zvicrës, Murat Yakin, pranoi vështirësitë që ka ndeshja, ndërsa theksoi se ekipi i tij është përgatitur edhe për penalltitë.

“Ne kemi pasur kohë që të praktikojmë edhe penalltitë. Të gjithë lojtarët patën mundësinë të gjuajnë nga një në stërvitje dhe ne mbajtëm disa shënime. Por, sigurisht, nuk është e njëjta gjë kur je nën presion dhe në një situatë stresuese. Ne kemi eksperiencën nga kompeticioni i kaluar, por shpresoj që loja të na shohë ne triumfues. Kemi luftuar shumë që të shkojmë deri këtu, dhe janë ndeshje shumë speciale. Në çdo vit, kombëtarja zviceriane ka zhvilluar lojëra interesante. Jemi shumë të lumtur që do të luajmë kundër Italisë, do të jetë një lojë shumë e hapur. Nuk dua të them se kush është favoriti. Ne i dimë kualitetet e tyre, taktikat e tyre dhe temperamentin, pra do jetë diçka speciale dhe ne shpresojmë që do të jetë një ndeshje e njëjtë me ato që kemi zhvilluar me ta më përpara. Italia është shtëpia e futbollit taktik, dhe mua më pëlqen shumë se si ata i bëjnë gjërat. Ata mbrojnë si një skuadër dhe si një shpirt i vetëm. Ne jemi përgatitur për gjithçka, por në fund duhet të fokusohemi te sistemi im, që duhet t’i kontrollojmë kundërshtarët dhe t’i surprizojmë ata.”, u shpreh Yakin.

Ndeshja mes Italisë dhe Zvicrës, është planifikuar të luhet këtë të shtunë, duke nisur nga ora 18:00.