Egnatia sfidon Partizanin, Tetova: Fushë e vështirë, fiton skuadra që...

4 Dhjetor 2024, 15:25, Sport CNA

Egnatia sfidon Partizanin, Tetova: Fushë e vështirë, fiton

Partizani-Egnatia do të jetë padyshim supersfida e javës së 16-të. Përballë vihen dy skuadrat më të mira të sezonit të kaluar, por edhe të dy vendeve të para në këtë sezon.

Në stadiumin “Arena e Demave” pritet të jetë një ndeshje shumë e bukur dhe e luftuar nga ekipet, që synojnë fitoren me çdo kusht.

Trajneri i Egnatias, në konferencën para ndeshjes, zbuloi se skuadra e tij është e plotë dhe gati për të bërë më të mirën.

“Kemi kaluar një javë shumë të mirë. Vijmë pas dy fitoreve si në Ballsh dhe me Elbasanin. Skuadra gëzon një formë të mirë dhe jemi gati për ndeshjen. Duke filluar që nga ndeshja me Elbasanin, kishim tri mungesa. Ishte njëfarë rotacioni, përtej kartonëve dhe gjendjes jo të mirë të Xhemajlit. Ato janë kthyer dhe besoj se formacioni është i plotë. Do shikojmë me kujdes gjendjen e Malotës, që doli i dëmtuar nga ndeshja e fundit. Do vendosim sot për gjithçka. Nuk ka pezullime. Është vetëm pjesa e Malotës që do ta shohim sot dhe do të vendosim”.

Tetova deklaroi se terreni ndaj Partizanit është i vështirë, por theksoi se do të jetë një ndeshje shumë e bukur dhe do të fitojë skuadra që gabon më pak.

"Është një fushë e vështirë sepse terreni është sintetik. Këto fusha tashmë nuk kanë tabu sepse me këto terrene po stërvitemi. Do të jetë ndeshje e bukur, luan vendi i parë me të dytin. Sigurisht që janë dy pikë, do mundohemi për revansh. Do shikojmë që të kemi një ndeshje të kujdesshme. Grupi do ta bëjë diferencën, ai që do gabojë më pak besoj do të dalë nga fusha e lojës me kokën lart”.

Trajneri kampion tha se është ende herët për të bërë parashikime për katër vendet e para, ndonëse ekipet kanë nisur shkëputjen.

"Shumë shpejt, akoma nuk jemi në gjysmën e kampionatit. Mendoj ato skuadra drejt katërshes kanë marrë rrugë, megjithatë asgjë nuk është e vulosur. Ka dhe skuadra të tjera që do të rivalizojnë, kështu do të presim fundin. Me skuadrën kundërshtare nuk jam marrë, informacionin e kam shumë të pakët. Te skuadra ime grupi po hyn në rrjedhën e lojës sime. Mendoj se nuk do të ketë largime, për faktin se lojtarët janë në kontratë, megjithatë do të presim janarin për të dhënë një formacion më të saktë. Është nëntë ndeshje larg, është ndeshje e kaluar. Tani ekipi ka tjetër fytyrë, megjithatë do të kërkojmë maksimumin nesër. Inferior jo, të mobilizuar ndoshta më shumë. Ky do të jetë fokusi ndoshta kryesor”.

Ndeshja Partizani-Egnatia, do të luhet ditën e enjte në orën 17:00 në kryeqytet.