web counter
LEXO PA REKLAMA!

SHKARKO APP

App Store
Google Play

E fundit!

x

Fusha "Sporti i Vogël", në Korçë e lënë në mëshirë të fatit

12 Korrik 2024, 22:32, Sociale CNA
Fusha "Sporti i Vogël", në Korçë e
Fusha sportive , Korçë

"Sporti i Vogël" është një nga fushat sportive më të njohura në qytetin e Korçës, dikur si një arenë loje, e sot e lënë në mëshirë të fatit. Në Korçë sportdashësit janë të shumtë, jo vetëm për futboll por edhe për lojërat me dorë si basketbolli, volejbolli, mundja etj. Fusha e "sportit të vogël", vite më parë, gëlonte nga tifozët korçarë që ndiqnin ndeshjet e zhvilluara pranë saj. Ndonëse fusha ndodhet në një lagje të populluar të qytetit, sot nuk plotëson asnjë kusht për të zhvilluar sportet me dorë. Vitet e fundit, ajo u përdor për sportin e tenisit por sot nuk ka as rrjetën që të mund të funksionojë për një lojë. Cna Tv sjell panoramën e shëmtuar të degradimit të fushës dhe ambjenteve përreth saj, me stolat ku bari është i papastruar, me fushën që mbushet me ujë në raste shiu duke e nxjerrë nga funksioni, me xhama të thyer, tualete të pisët.

Korçarët kanë treguar me shumë keqardhje situatën aktuale që ndodhet ky kënd sportiv, aq i dashur dikur për ta, por që sot është jashtë çdo lloj kushti qoftë edhe minimal.

"Këtu më përpara luhej basketboll, volejboll, ka qenë edhe çiklizmi. Këtu ndërroheshin, laheshin. Ja si është tani, shikoje, ka vajtur bari 2 metër, është gjynah. Si nuk ka vjen keq, në stadium kemi nxjerrë gishtërinjtë me top 45-ç. Dhe kur i shikojmë tani, na vjen keq. Këtu kam lindur dhe jam rritur."

"Kujdesi për këto është i pakët, ndoshta është dhe ngaqë janë hapur në stadiumi fusha të reja, mund të jetë një nga arsyet. Nuk mbahet mend sa vite ka kështu. Bëhej më parë kampionati i tenisit, lojëra me dorë, volejboll, basketboll."

 

"Po bën 8 a 9 vjet. E kanë lënë pa pastruar, kanë vjedhur dyert këtej. Keq është, sështë gjë e mirë. Ne dikur vinim i shikonim, uleshim, kurse tani... Më parë kishte pastërti, disiplinë, rregull, tani e kanë lënë kështu. Më vjen keq, jam 67 vjeç, e dua sportin. Kur luhej ndeshja, mbushej i gjithë stadiumi sa s'kishte vende. Na vjen keq që mbeti kështu, do e bëjmë sot, do e bëjmë nesër, kur do e bëjnë?"

 

"Këtu ka qenë për mundje, pastaj u bë për basketboll e lojëra të tjera. Ka vite shumë që s'kanë vënë dorë. E kanë lënë në mëshirë të fatit. Na vjen keq se ne këtu kalojmë çdo ditë."

 

"Kishte njerëz, luanin, kurse tani kanë ikur dhe ngelën vetëm pleqtë. Shumë keq, na vjen keq. E shohim këtë fushë dhe duam që fëmijët të luajnë si luanin qëmoti."

 

Për banorët e Korçës nuk mbahet mend ndërhyrja e fundit që është bërë në këtë vend. Keqardhja e tyre mbetet shumë e madhe për lënien në harresë të "sportit të vogël", që mbart një histori shumëvjeçare të qytetit sportdashës./ CNA

 





Lajmet e fundit nga