Telefonatat e gjata në celular shkaktojnë rritjen e presionit të gjakut

7 Maj 2023, 10:56, Shëndeti CNA

Telefonatat e gjata në celular shkaktojnë rritjen e presionit të

Foto ilustruese

Të folurit në celular për 30 minuta ose më shumë gjatë një jave, lidhet me 12 për qind më rrezik për t’u prekur nga presioni i lartë i gjakut, krahasuar me të folurin për më pak se 30 minuta. Në këtë përfundim ka arritur një studim i botuar së fundmi në “European Heart Journal-Digital Health”.

“Është numri i minutave që shpenzojnë njerëzit duke folur në një celular, ai që ka rëndësi të madhe për shëndetin e zemrës. Më shumë minuta që do të thotë rrezik më i madh”, - thotë autori i studimit, profesor Xianhui Qin i Universitetit Mjekësor Jugor në Guangzhou, Kinë, që gjithsesi thekson se nevojiten më shumë studime për të konfirmuar këtë lidhje.

Pothuajse tre të katërtat e popullsisë globale të moshës 10 vjeç e lart kanë një telefon celular. Gati 1.3 miliardë të rritur të moshës 30-79 vjeç në mbarë botën, vuajnë nga presioni i lartë i gjakut (hipertensioni). Hipertensioni është një faktor rreziku kryesor për atakun në zemër dhe goditjen në tru, dhe një shkak kryesor i vdekjeve të parakohshme në nivel global.

Telefonat celularë lëshojnë nivele të ulëta të energjisë së radiofrekuencës, e cila është lidhur me rritjen e presionit të gjakut pas ekspozimit afatshkurtër. Rezultatet e studimeve të mëparshme mbi përdorimin e telefonit celular dhe presionin e gjakut ishin të paqëndrueshme, sepse ato përfshinin telefonata, mesazhe me tekst, lojëra, etj.

Ky studim shqyrtoi lidhjen midis kryerjes dhe marrjes së telefonatave dhe hipertensionit. Studimi përdori të dhëna nga Biobank në Mbretërinë e Bashkuar. Janë përfshirë gjithsej 212.046 të rritur të moshës 37-73 vjeç pa hipertension.

Informacioni mbi përdorimin e një telefoni celular për të marrë dhe përgjigjur telefonatave, u mblodh përmes një pyetësori të vetëraportuar me ekran me prekje, duke përfshirë vitet e përdorimit, orët në javë dhe përdorimin e kufjeve.

Pjesëmarrësit që përdornin një telefon celular të paktën një herë në javë për të kryer ose marrë telefonata, u përcaktuan si përdorues të telefonisë celulare. Studiuesit analizuan lidhjen midis përdorimit të telefonit celular dhe hipertensionit, pas përshtatjes së të dhënave me moshën, gjininë, indeksin e masës trupore, racën, privimin, historinë familjare të hipertensionit, arsimin, statusin e pirjes së duhanit, presionin e gjakut, yndyrnat e gjakut, inflamacionin, glukozën në gjak, funksionin e veshkave dhe përdorimin e medikamenteve për të ulur kolesterolin ose nivelin e glukozës në gjak.

Mosha mesatare e pjesëmarrësve ishte 54 vjeç, 62 për qind ishin gra dhe 88 për qind ishin përdorues të celularëve. Gjatë një vëzhgimi mesatar prej 12 vitesh, 13.984 (7 për qind) e pjesëmarrësve shfaqën hipertension. Përdoruesit e telefonave celularë, ishin 7 për qind më të rrezikuar nga hipertensionit krahasuar me jo-përdoruesit.

Ata që bisedonin në celularin e tyre për 30 minuta ose më shumë në javë, kishin 12 për qind më shumë gjasa të prekeshin nga presioni i lartë i gjakut, sesa pjesëmarrësit që shpenzuan më pak se 30 minuta në telefonata me celular. Rezultatet ishin të ngjashme për gratë dhe burrat.

Duke i parë gjetjet në mënyrë më të detajuar, krahasuar me pjesëmarrësit që shpenzonin më pak se 5 minuta në javë duke marrë apo pranuar telefonata në celular, koha javore e përdorimit prej 30-59 minutash, 1-3 orë, 4-6 orë dhe më shumë se 6 orë, ishte e shoqëruar me një rrezik të rritur të presionit të lartë të gjakut përkatësisht 8, 13, 16 dhe 25 për qind.

Në mesin e përdoruesve të telefonave celularë, vitet e përdorimit dhe përdorimi i një pajisjeje me kufje, nuk ishin të lidhura ndjeshëm me zhvillimin e hipertensionit. Po ashtu, studiuesit ekzaminuan lidhjen midis kohës së përdorimit (më pak se 30 minuta, kundrejt 30 minutave ose më shumë) dhe hipertensionit sipas faktit nëse pjesëmarrësit kishin një rrezik gjenetikisht të ulët, të ndërmjetëm apo të lartë të zhvillimit të hipertensionit.

Rreziku gjenetik u përcaktua duke përdorur të dhënat e Biobank në Britaninë e Madhe. Analiza tregoi se gjasat e zhvillimit të presionit të lartë të gjakut, ishin më të mëdha tek ata me një rrezik të lartë gjenetik dhe që kalonin të paktën 30 minuta në javë duke folur në celular.

Ata kishin 33 për qind më shumë gjasë për hipertension, krahasuar me ata me një rrezik të ulët gjenetik që shpenzonin më pak se 30 minuta në javë në telefon. Profesor Qin thotë: "Gjetjet tona sugjerojnë se të folurit në celular, nuk mund të ndikojë në rrezikun e zhvillimit të presionit të lartë të gjakut, për sa kohë që koha e telefonatave javore mbahet nën gjysmë ore. Duhen më shumë kërkime për të përsëritur rezultatet. Por deri atëherë duket të kujdesshëm për të pasur sa më pak telefonata në celular për të ruajtur shëndetin e zemrës”./ Përshtatur nga CNA.al