Pse është i ndaluar konsumi i lëngjeve para një operacioni kirurgjikal?

28 Shkurt 2023, 08:42, Shëndeti CNA

Pse është i ndaluar konsumi i lëngjeve para një operacioni

Shumë pak nga ne e vënë në dyshim idenë se nuk duhet të hamë ose të pimë, “nil per os ” ose “asgjë në gojë” - për të paktën përkatësisht 6 dhe 2 orë, përpara çdo operacioni kirurgjikal. Por kjo praktikë mund të ndryshojë.

Një numër në rritje spitalesh në mbarë botën, kanë filluar të kenë një qasje të re, e cila i lejon pacientët të vazhdojnë të pinë sasi të vogla lëngjesh, deri pak para se të dërgohen në sallën e operacionit. Po pse po ndodh ky ndryshim, dhe pse nuk kemi qenë në gjendje që të pimë më parë lëngje?

Në fakt, futja e rregullit të agjërimit daton në traditat e hershme kirurgjikale të vendosura në mesin e shekullit XIX. Në vitin 1850, dr.Xhon Snou rekomandoi që pacientët të hanë një “mëngjes ose drekë të lehtë nga 2-4 orë” përpara se të anestezohen me eter ose kloroform.

Ai besonte se kjo do të shmangte “efektin e pakëndshëm” të të vjellave. Ndërsa Snou donte të kufizonte gjasat që një pacient të villte mbi të, shumë shpejt u kuptua se kjo mund të ishte një gjë kërcënuese për jetën. Në vitin 1862, gjatë një seminari mjekësor të mbajtur në Edinburg të Skocisë, përdorimi i kloroformit i lidh me një “shkak të ri vdekjeje”, pasi një ushtar në Birmani pati të vjella gjatë një operacioni për një plagë me armë zjarri.

Një autopsi e ushtarit të nxjerrë, zbuloi se trakeja e tij ishte “e mbushur me lëndë të vjella”. Vetëm pasi kirurgu i famshëm britanik, Sër Xhozef Lister, publikoi një sërë udhëzimesh për agjërimin para operacionit, ne shohim që të bëhet midis konsumit të ushqimit dhe lëngjeve.

Rekomandimi i tij mbeti në tekstet mjekësore deri në vitet 1960. Megjithatë, për gjeneratat e fundit të anestezistëve, rregulli i agjërimit u bë dogmë procedurale pas vitit 1947, kur Kërtis Mendelson, një obstetër nga Nju Jorku, botoi një artikull tashmë të famshëm të quajtur “Përthithja e përmbajtjes së stomakut në mushkëri gjatë anestezisë obstetrike”.

Mendelson shqyrtoi rastet e 66 grave që kishin thithur një pjesë të përmbajtjes së stomakut gjatë lindjes. Ai arriti në përfundimin se fyti i grave ishte relaksuar për shkak të anestezisë së përgjithshme, e cila e lejoi ushqimin e patretur të kalonte në ezofag dhe nga andej të hynte në mushkëri.

Në disa raste, ajo shkaktoi mbytje dhe asfiksi, të cilat çuan deri në vdekje. Por në raste të tjera lënda ushqimore nuk u zbulua, dhe në fund shkaktoi pneumoni dhe infeksione të tjera pulmonare. Mendelson bëri një sërë rekomandimesh, njëra prej të cilave ishte që gratë që i nënshtroheshin lindjes, duhet të agjëronin vetëm në rast se kishin nevojë të viheshin nën anestezi.

Këto rekomandime janë rishikuar dhe ndryshuar me kalimin e kohës, por ideja që duhet shmangur pirja e ujit mbeti në fuqi që nga ajo kohë. Por gjatë 10 viteve të fundit, janë bërë më të zakonshme përpjekjet për të liberalizuar rregullat rreth konsumit të lëngjeve.

Spitalet në Britaninë e Madhe, SHBA dhe shumë vende të tjera, kanë miratuar rregulla që i lejojnë pacientët të vazhdojnë të pinë lëngje të pastra - si uji, çaji i zi dhe lëngjet e frutave – deri pak para operacioneve të tyre. Një nga arsyet e këtyre ndryshimeve, është se një numër alarmant i pacientëve kanë mbetur pa ujë për periudha të gjata dhe të rrezikshme.

Meqë operacionet e planifikuara vonohen për shkak të urgjencave, disa pacientë në një studim mbi njerëzit që ishin operuar në kofshë, u zbulua se kishin kaluar midis 6-10 orë pa konsumuar lëngje. Dhe dehidrimi para operacionit është i dëmshëm. Ai mund të shkaktojë të vjella dhe gjendje deliriumi para dhe pas operacionit, ndër disa nga efektet e tjera.

Ndërkohë studimet e fundit kanë treguar se kërcënimi i kalimit të ushqimit dhe lëngjeve në mushkri është i ekzagjeruar. Në fakt, duket se mbi gjysma e personave që i nënshtrohen një operacioni urgjent kanë ushqim e pije në stomak, por kjo nuk rrit numrin e rasteve të asfiksimit. Duket se komuniteti mjekësor ka nisur tani që t’i vërë re këto ndryshime, ndaj rregulli i agjërimit mund të bëhet së shpejti një gjë që i përket së kaluarës.

Përkthyer nga CNA.al