E fundit!

19:37 Aktualitet

Mbahet protesta e 25-të kundër qeverisë, qytetarët ‘sfidojnë’ shiun

Këtë të mërkurë ka nisur grumbullimi i qytetarëve për prot...

Humbjet e jetës nga COVID-19, ndodhin shpesh për shkak të një infeksioni bakterial

14 Shtator 2022, 08:42, Shëndeti CNA

Humbjet e jetës nga COVID-19, ndodhin shpesh për shkak të

Ne flasim shpesh për dhjetëra miliona vdekjet e shkaktuara nga pandemia e gripit spanjoll e vitit 1918. Por a jemi të sigurt se ishte vërtet virusi H1N1, ai që i vrau të sëmurët? Sipas një artikulli në ‘The Conversation” të shkruar nga imunologu Hajli Mundlein, shpeshherë shkaku i vdekjeve të të infektuarve nga një virus nuk është vetë virusi, por një infeksion bakterial shoqërues.

Kështu ka ndodhur jo vetëm në rastin e gripit spanjoll, siç dëshmohet edhe nga analiza e mostrave të indeve të mushkërive të marra nga të vdekurit (shumica e të cilëve vdiqën nga pneumonia bakteriale), por edhe të pandemive të virusit H2N2 të vitit 1957, dhe virusit H1N1 në pandeminë e vitit 2009, kur gati 1/5 e të infektuarve u prekën edhe nga infeksionet bakteriale, të cilat e rrisin rrezikun e tyre për të humbur jetën.

Edhe për COVID-19 vlen e njëjta logjikë

Edhe COVID-19 duket se sillet në të njëjtën mënyrë. Sipas një studimi sistematik të kryer në vitin 2021, midis 16-28 për qind e të rriturve të shtruar në repartet e terapisë për shkak të COVID-it, kishin gjithashtu një infeksion bakterial.

“Krahasuar me ata që sapo u infektuan me koronavirusin, këta pacientë qëndruan në spital për një kohë 2 herë më të gjatë. Po ashtu. ata ishin 4 herë më të rrezikuar të kishin nevojë për ventilim mekanik, dhe 3 herë më shumë të rrezikuar të humbnin jetën”- shpjegon Mundlein.

Një bashkëpunim vdekjeprurës

Por si ndërveprojnë viruset dhe bakteret, duke e dobësuar trupin ku strehohen? Ata punojnë në ekipe. Në fakt viruset janë në gjendje të vrasin qelizat epiteliale që mbulojnë mushkëritë, dhe të veprojnë si një pengesë kundër patogjenëve të thithur atje, duke i lënë të lira bakteret.

Po ashtu, viruset gjithashtu mund ta ndryshojnë sipërfaqen e qelizave epiteliale dhe imune, duke e reduktuar numrin e receptorëve që i lejojnë ata të njohin patogjenët, dhe ta përgatisin trupin për një përgjigje. Edhe në këtë rast, bakteret gjejnë një fushë të lirë për të pushtuar organet dhe për të shkaktuar infeksion.

Po si mund të luftohen viruset dhe bakteret?

Meqë antiviralët nuk veprojnë kundër baktereve, dhe antibiotikët nuk funksionojnë kundër viruseve, atëherë a ka ndonjë ilaç që mund të luftojë të dy patogjenët në të njëjtën kohë? Një studim, në të cilin mori pjesë edhe Mundlein, ofron një zgjidhje të mundshme.

Ajo është molekula ZBP1, e cila luan një rol themelor në përgjigjen imunitare të trupit tonë ndaj gripit, që duket se është në gjendje të zbulojë viruset e gripit në mushkëri, dhe t’i detyrojë të vetasgjësohen qelizat imunitare dhe epiteliale të infektuara.

Në këtë mënyrë eliminohen qelizat e infektuara, dhe “rekrutohen” qelizat e reja të shëndetshme imune për ta luftuar infeksionin. “Ka të ngjarë që trajtimet që rrisin nivelin e molekulës ZBP1 te disa lloje qelizash, mund të jenë shumë pozitive në menaxhimin e bashkinfeksioneve bakteriale dhe virale”, - përfundon Mundlein.

Përkthyer dhe përshtatur nga CNA.al