web counter
LEXO PA REKLAMA!

SHKARKO APP

App Store
Google Play

Britania miraton vaksinën kundër koronavirusit dhe varianteve të tij

15 Gusht 2022, 16:18, Shëndeti CNA
Britania miraton vaksinën kundër koronavirusit dhe varianteve të
Vaksinë kundër koronavirusit

Mbretëria e Bashkuar është bërë shteti i parë që ka miratuar vaksinën e cila shënjestron variantin origjinal të koronavirusit, si dhe variantin e ri Omicron.

Vaksina e re do të jetë e qasshme si dozë përforcuese në vjeshtë, ashtu që banorët të kenë mbrojtje shtesë kundër varianteve të këtij virusi.

Kompania Moderna – që ka krijuar këtë vaksinë – ka thënë se do të nisë shpërndarjen e dozave në javët në vijim, ndonëse ende nuk dihet saktë se kush do t’i marrë.

Eksperimenti me 437 njerëz ka treguar se vaksina e re është e sigurt dhe ofron mbrojtje më të madhe ndaj varianteve të reja.

Vaksinat origjinale, që janë përdorur pas shpërthimit të pandemisë, kanë qenë të dizajnuara që të mësojnë trupin si ta luftojë virusin.

Prej atëherë koronavirusit i janë krijuar mutacione dhe variantet e reja kanë rezultuar më rezistente ndaj vaksinave.

Moderna nuk është kompania e vetme që ka ndryshuar formulën e vaksinave kundër koronavirusit.

Edhe kompania tjetër amerikane, Pfizer, është duke zhvilluar vaksina që shënjestrojnë variantin Omicron.

Për koronavirusin e ri, që shkakton sëmundjen COVID-19, është raportuar për herë të parë në dhjetor të vitit 2019 në Vuhan të Kinës.

Organizata Botërore e Shëndetësisë e pati shpallur koronavirusin si pandemi më 11 mars të vitit 2020.

Deri më tani janë regjistruar mbi 6 milionë njerëz të vdekur me këtë virus./ REL





Lajmet e fundit nga