web counter
LEXO PA REKLAMA!

SHKARKO APP

App Store
Google Play

Zhupa takim me senatorin italian/ Fokus forcimi i marrëdhënieve dhe vota e diasporës

26 Maj 2026, 15:41, Politikë CNA

Zhupa takim me senatorin italian/ Fokus forcimi i marrëdhënieve dhe

Deputetja e Partisë Demokratike, Ina Zhupa ka zhvilluar një takim me senatorin italian Raffaele De Rosa.

Me anë të një postimi në rrjetet sociale, Zhupa shkruan se gjatë takimit ka biseduar me senatorin italian mbi forcimin e marrëdhënieve mes dy parlamenteve dhe rolin e rëndësishëm të diasporës shqiptare në Itali.

Zhupa shprehet se gjatë takimit u diskutua gjithashtu dhe nevoja për zgjerimin e bashkëpunimit ekonomik dhe turistik.

 

 

Postimi i Zhupës

 

Kënaqësi të zhvilloja një takim me Senatorin italian Raffaele De Rosa, anëtar i Komisionit për Punët e Jashtme dhe Mbrojtjen, si edhe i Komisionit për të Drejtat e Njeriut në Senatin Italian.

Biseduam mbi forcimin e marrëdhënieve mes dy parlamenteve tona, rolin e rëndësishëm të diasporës shqiptare në Itali dhe mbështetjen e vazhdueshme që Italia i ka dhënë Shqipërisë në rrugën e integrimit europian. Historia, miqësia dhe solidariteti mes dy kombeve tona mbeten një urë e fortë bashkëpunimi, për të cilën shqiptarët kanë mirënjohje të veçantë.

Diskutuam gjithashtu për nevojën e zgjerimit të bashkëpunimit ekonomik, kulturor dhe turistik, duke afruar më shumë institucionet dhe qytetarët tanë. Mundësinë e hapjes se konsullatës në Padova, edhe nevojën për të shtuar numrin e konsujve të nderit. Mësimi i gjuhës shqipe për fëmijët shqiptar ka ecur nga shoqatat atje por ka nevojë për më shumë mbështetje institucionale.

Një çështje me rëndësi ishte edhe vota e diasporës. Eksperienca e zgjedhjeve të fundit tregoi se ka shumë probleme që duhen adresuar për të garantuar një proces të sigurt, të besueshëm dhe funksional për shqiptarët jashtë vendit. Modeli italian i votimit të diasporës është një eksperiencë që mund të studiohet dhe diskutohet nga Komisioni i Posaçëm i Reformës Zgjedhore, me synimin për të përmirësuar përfaqësimin dhe pjesëmarrjen e shqiptarëve kudo ku jetojnë.





Lajmet e fundit nga