Zgjedhjet në Himarë/ Presidenti dekreton 4 gusht-in, për zgjedhjen e kryetarit të bashkisë. Nuk zbaton afatin 30 ditor të ankimimit

5 Korrik 2024, 16:20, Politikë CNA

Zgjedhjet në Himarë/ Presidenti dekreton 4 gusht-in, për

Presidenti i Republikes, Bajram Begaj

Presidenti I Republikës, Bajram Begaj ka dekretuar zgjedhjet në Himarën në datën 4 gusht 2024. Dekreti I Presidentit vjen menjëherë pas vendimit të KQZ për heqjen e mandatit Fredi Belerit. Ndërkohë vendimi vjen në një kohë kur nuk është zbatuar afati i ankimit 30 ditor nga vendimi sotëm i KQZ. Në këto kushte shpallja e zgjedhjeve në Himarë është bërë në shkelje të ligjit. Duke i lën afat për fushatë vetëm 29 ditë. Ndërsa zgjedhjet do të zhvillohen në kulmin e sezonin turistik

Njoftimi I Presidenti

Sot, Këshilli i Ministrave njoftoi zyrtarisht Presidentin e Republikës për vakancën e krijuar në bashkinë Himarë për shkak të konstatimit të pavlefshmërisë së mandatit të fituar nga z. Dhionisios (Alfred) Petro Beleri dhe kërkoi caktimin e datës së zgjedhjeve, brenda afateve që përcakton Kodi Zgjedhor.

Kryetari i zgjedhur i bashkisë Himarë është gjendur nga Komisioni Qendror i Zgjedhjeve në kushtet e pavlefshmërisë së mandatit, për shkak të dënimit me vendim të formës së prerë për veprën penale të “korrupsionit aktiv në zgjedhje”, të parashikuar nga neni 328 i Kodit Penal të Republikës së Shqipërisë.

Presidenti i Republikës, Begaj thirri në konsultë Ilirjan Celibashin, Komisionerin Shtetëror të Zgjedhjeve për t’u informuar lidhur me kapacitetet dhe gadishmërinë e institucionit menaxhues të zgjedhjeve, për zhvillimin e zgjedhjeve në këtë bashki, brenda kornizës kalendarike të Kodit Zgjedhor.

Pas kësaj konsulte, Presidenti Begaj dekretoi datën 4 gusht 2024 për zhvillimin e zgjedhjeve për kryetar bashkie në bashkinë Himarë, si alternativa më e mirë që pajton nevojën për përgatitjen dhe zhvillimin e një fushate të rregullt zgjedhore dhe nevojën për përgatitjen optimale të administratës zgjedhore, me kushtet, rrethanat dhe ngarkesën që sjell sezoni turistik për bashkinë Himarë, si njësi bregdetare e qeverisjes vendore./CNA