web counter
LEXO PA REKLAMA!

SHKARKO APP

App Store
Google Play

Zgjedhjet 2025/ Niko Peleshi: PS synon minimalisht 6 mandate në Korçë

23 Shtator 2024, 18:25, Politikë CNA
Zgjedhjet 2025/ Niko Peleshi: PS synon minimalisht 6 mandate në
Drejtuesi politik i PS-së për Korçën, Niko Peleshi

Partia Socialiste ka si synim që të marrë të paktën 6 mandate deputetësh në qarkun e Korçës.

Këtë e bëri të ditur drejtuesi politik i PS-së për Korçën, Niko Peleshi, në një prononcim për mediat.

Peleshi tha se PS do të ketë një diferencë prej të paktën 2 deputetësh nga PD-ja.

Ai theksoi se qarku i Korçës mund të ketë një mandat më pak nga zgjedhjet e kaluara për shkak të largimit të popullsisë.

“Partitë e mëdha në zgjedhjet parlamentare kanë gjithmonë synim të fitojnë zgjedhjet. PS shkon për mandatin e 4-t dhe është shumë pranë tij gjithsesi ne jemi mësuar që i marim me seriozitet punët dhe në kohën e duhur pavarësisht si është kundërshtari përballë, ne shohim punën tonë dhe sfidat e PS-së janë me të ardhmen dhe objektivin e Shqipërisë jo të PS-së vetëm, që është anëtarësimi i Shqipërisë në BE në vitin 2030. Një objektiv që 10 vite më parë përdorej si fjalë për t’i dhënë lezet deklaratave politike që sot është një realitet që artikulohet edhe nga zyrtarët e lartë të BE-së. Është një datë që ne e kemi kthyer në plan pune, Parlamenti nga ana tjetër ka detyrat e veta në këtë process. Pra, synimi ynë është të fitojmë mandatin 4 për të vazhduar pa humbur ritmin, në rrugën drejt destinacionit historik të shqiptarëve që është anëtarësimi në BE në 2030.

Ka mundësi që për shkak të rritjes së numrit të votuesve të popullsisë në Tiranë, qarku i Korçës mund të ketë një mandat më pak, ndonëse Korça si bashki dhe qark ishte zona me uljen më të vogël të popullsisë. Objektivi ynë vazhdon të jetë i njëjti, ne do të marrim minimalisht 6 deputetë, me një diferencë prej të paktën 2 deputetësh nga PD, por duke patur parasysh dhe potencialin e ri që i ofrohet politikës me kodin e ri të ndryshuar zgjedhor, që është vota e Diasporës, objektivat dhe mund të rriten sepse ka një potencial të madh në Diasporë. Pra, ne mund të kemi votues në Diasporë po aq sa edhe në Shqipëri. Një nga pikat e takimit në çdo asamble të PS-së, në bashkitë e qarkut është organizimi për votën e Diasporës”, u shpreh ai.

Drejtuesi politik i PS-së shpjegoi edhe listat e PS-së për Korçën, mdërsa theksoi se për të nuk ka rëndësi nëse do të jetë në listë të hapur apo të mbyllur.

“Nëse do të jenë 10 deputetë do jenë 3 mandate të mbyllura në qarkun e Korçës, nëse do të jenë 11 deputetë do të jenë 4 mandate të mbyllura

Këtu nuk është çështja e emrave, as e emrit tim, as e ndonjë emri tjetër. Objektivat janë me numra jo me emra, ne duam të mbajmë minimalisht 6 deputetë në qark. Ky sistem nxit garën e shëndetshme brenda partisë dhe maksimizon votën, pra pjesa jashtë listës së mbyllur duhet të vrapojë më shumë, të sjellë më shumë vota. Kjo është demokracia.

Ne nuk kemi akoma një formulë të konsoliduar, por është vendosmëria jonë për të shënuar një tjetër hapje edhe më të madhe të PS në këtë proces zgjedhor. Hapja e PS-së është në AND-në e saj, çelësi i suksesit të pothuajse 4 mandateve, por edhe më herët. Unë vetë jam një produkt i hapjes në një kohë të caktuar, ne po krijojmë mekanizma siç është akademia politike për të rinjtë apo platforma që inkurajon të rinjtë, pra një korsi më e shkurtër krahasuar me korsinë normale burokratike të kontributeve në parti”, nënvizoi Peleshi./ CNA





Lajmet e fundit nga