web counter
LEXO PA REKLAMA!

SHKARKO APP

App Store
Google Play

"Të synojmë një qeveri kalimtare"/ LZHK: Të krijojmë një front të përbashkët opozitar

13 Qershor 2025, 15:00, Politikë CNA

"Të synojmë një qeveri kalimtare"/ LZHK: Të

LZHK ka bërë një deklaratë në lidhje me zgjedhjet e 11 majit, ku shprehet se merr përgjegjësitë e saj për humbjen.

Më tej, në deklaratën e LZHK-së thuhet se mund të shkohet drejt pavlefshmërisë së tyre dhe deri më tani legjitimiteti i tyre është në pikëpyetje të madhe.

Në deklaratën e bërë, LZHK kërkon kryerjen e një analize të thellë të zgjedhjeve dhe të merren përgjegjësitë që i takojnë opozitës.

Gjithashtu LZHK kërkon bashkimin e frontit opozitar për të synuar një qeveri kalimtare.

 

Deklarata e plotë

"Lëvizja për Zhvillim Kombëtar" është subjekti i vetëm që ka bërë analizën e zgjedhjeve politike të 11 majit 2025 duke marrë përgjegjësitë e veta për humbjen, por shumë shpejt koha na dha të drejtë për atë investim prej dy vitesh të LZHK-së për të bërë një reformë zgjedhore sipas standardeve demokratike në dobi të zgjedhjeve të lira, të drejta, të ndershme dhe të pranuara nga konkurruesit.

Nëse kjo do të realizohej, e gjithë opozita do të ishte e bashkuar dhe sot do të ishte situatë tjetër.

 

Megjithëse ka kaluar një muaj nga zhvillimi i votimeve, nxjerrja e rezultatit përfundimtar duket e largët për të mos thënë se zgjedhjet mund të shkojnë drejt pavlefshmërisë së tyre. Rinumërimi i votave në KQZ, deri tani të rreth 50 % të qendrave të votimit tregon se legjitimiteti i zgjedhjeve është në pikëpyetje të madhe.

 

Koha na dha të drejtë se "Lëvizja për Zhvillim Kombëtar" i kërkoi gjithë opozitës;

1. Barazinë e votës, me një sistem proporcional kombëtar ose 4 zona elektorale

Pasojat e këtij sistemi zgjedhor:

- PS me 53.27 % të votave nga 74 mandate ka marrë 83 mandate, + 9

- PD me 32.93 % nga 46 mandate ka marrë 50 mandate, + 4

- Nisma me 4 % nga 5 mandate ka marrë vetëm 1

- Të gjitha subjektet jashtë PS & PD kanë marrë 221,811 vota, 15 % të votave nga 21 mandate kanë marrë vetëm 7 mandate, - 14

 

2.  Lista të hapura plotësisht

Pasojat që 1/3 e kandidatëve të jenë në lista të mbyllur:

 

- Diskriminim të kandidatëve edhe brenda një subjekti, dikush bëhet deputet pa vota fare dhe dikush me rreth njëzet mijë nuk bëhet deputet. 

 

- Pabarazia mes kandidatëve të së njëjtës parti nuk motivoi kandidatët e opozitës për të bërë fushatë tek elektorati gri.

 

3. Votim dhe numërim elektronik

Pasojat e numërimit me komisioner;

- Ka kaluar një muaj nga numërimi i votave dhe akoma nuk kemi rezultat zyrtar.

- Rraskapitje e komisionerëve, numëruesve, vëzhguesve, kandidatëve, etj.

- Manipulime dhe kontestime të votave sidomos për ato preferenciale.

- Kosto shumë e madhe financiare.

 

4. Vota e diasporës

Nëse nuk do të kishim një sistem proporcional kombëtar, LZHK kërkoi që të shtohej edhe një Rajon vetëm për diasporën, nga 12 në 13.

 

Pasojat;

- 200,000 votat e diasporës nuk prodhuan asnjë mandat, pasi u shpërndanë në 12 qarqe dhe ndryshuan vetëm një mandat në Vlorë.

Për sa më sipër, gjithë këto pasoja janë vetëm prej Reformës Zgjedhore, që duke i shtuar edhe gjithë infrastrukturën shtetërore që qeveria përdori për të manipuluar votën e shqiptarëve, "Lëvizja për Zhvillim Kombëtar" shpreh qëndrimin e saj se më 11 maj 2025 nuk janë zhvilluar zgjedhje, por votime.

 

Ne do të vazhdojmë të bëjmë detyrën tonë në dobi të demokracisë, shqiptarëve dhe Shqipërisë. Në këtë kontekst, "Lëvizja për Zhvillim Kombëtar" mendon që është emergjencë kombëtare, të përqendrohemi te:

 

1. Vazhdimi i mbledhjes së fakteve që kanë deformuar vullnetin e zgjedhësve dhe dërgimin e tyre në KQZ dhe te ndërkombëtarët.

 

2. Kryerja e një analize të thellë, ku të dalin përgjegjësitë objektive të opozitës.

 

3. Bashkimi politik në një front të përbashkët të të gjithë faktorëve dhe aktorëve opozitarë, për të synuar një qeveri kalimtare me mandat të kufizuar për të realizuar:

- Ndryshimet kushtetuese.

- Rishikimin e reformës territoriale.

- Reformën zgjedhore.

- Zgjedhjet e parakohshme.

 

"Lëvizja për Zhvillim Kombëtar" shpreh gatishmërinë e saj për t’u angazhuar në këtë proces dhe ka bindjen e plotë se opozita do të ringrihet fuqishëm për të ndryshuar realitetin aktual në Shqipëri./ CNA





Lajmet e fundit nga