web counter
LEXO PA REKLAMA!

SHKARKO APP

App Store
Google Play

Mero Baze: Rruga e Shqipërisë për në BE kalon nga Erion Veliaj  

12 Qershor 2025, 21:01, Politikë REDAKSIONALE

Mero Baze: Rruga e Shqipërisë për në BE kalon nga Erion

Klienti i pushtetit dhe miku i ngushtë i Erion Veliajt, Mero Baze, i cili dilte në përgjimet që CNA ka publikuar nga burgu i Durrësit, ka dalë së fundi me qëndrimin e tij më spektakolar.

Sipas Mero Bazes, rruga e Shqipërisë për në BE kalon nga Erion Veliaj.

Në këta 4 muaj pas arrestimit të kryebashkiakut të Tiranës, në fletoren rilindase që Mero Baze e përdor për të sulmuar Sali Berishën, në mënyrë kjo për të shtuar pasuritë e tij miliardëshe, çfarë nuk ka thënë e çfarë nuk është lexuar.

"LATIFI" NGA ANGLIA SULM NDAJ SPAK-ut

Shpiki një “Latif” nga Anglia që nuk dihet si u pagua për të bërë disa podkaste kur na thoshte se ishte shqetësuese sjellja e SPAK-ut ndaj kryebashkiakut të Tiranës, kur në fakt edhe pse kërkonte të krijonte një diversion apo presion mbi institucionin e prokurorisë, në finale tha se nëse akuzat vërtetoheshin do të ishte një situatë shumë e rëndë.

Se përse duhet të fliste një këshilltar tip “Latifi” nga Anglia për t’i dhënë mend drejtësisë në Shqipëri, gjyqtarëve, prokurorëve etj., këtë e di Mero apo çdo “çorape” tjetër e Rilindjes, apo 99-çave të Erion Veliajt, të cilët po përpiqen tashmë të përdorin 1001 mënyra për ta nxjerrë në Gjykatën e Lartë.

Por nuk është vetëm ky rast. Është edhe rasti i sulmeve që erdhën në media pas publikimit të përgjimeve. Është edhe rasti i mashtrimit publik të bërë nga mediat e pushtetit se prokurorët kishin marrë para për të dënuar Erion Veliajn dhe kjo kalonte nëpërmjet një komunikimi pikërisht me Mero Bazen. Janë sulmet kriminale ndaj prokurorit Ols Dado, janë sulmet banditeske ndaj SPAK-ut dhe këto të bëra kryesisht në mediat që janë paguar nga inceneratorët apo janë brenda aferave të pushtetit.

Janë po të njëjtat këllira mediatike që na thanë se ekzistonin inceneratorët për një aferë që tashmë ka shkuar mbi 200 milionë euro, janë të njëjtët që na thanë se në Shqipëri hahet me lugë floriri, ata që na treguan se Erion Veliaj është një burrë i ndershëm, ndërsa sot nga SPAK-u dhe të konfirmuara nga gjykata ka të paktën 12 akuza nga të cilat 9 për korrupsion dhe këto akuza janë për të paktën 4 nene të Kodit Penal.

MERO BAZE: RRUGA E SHQIPËRISË PËR NË BE KALON NGA VELIAJ

Së fundi, në një publikim që ka bërë vetë Mero Baze, na thotë se rruga e Shqipërisë për në BE kalon nga Erioni, por, sipas tij, mund të kemi probleme me integrimin tonë në BE për shkak të padrejtësisë që po bëhet ndaj kryebashkiakut të Tiranës që ka paguar, ka punësuar dhe ka pasuruar Mero Bazen dhe familjarët e tij.

Mero Baze: Rruga e Shqipërisë për në BE kalon nga Erion
Shkrimi i Mero Bazes

Në fakt, SPAK-u duket se është i vetmi institucion që garanton Shqipërinë në rrugën drejt BE-së, pasi një nga pikat kyçe të BE-së është lufta e pandalshme ndaj korrupsionit të zyrtarëve të lartë të shtetit, politikanëve dhe administratës. Ndaj dhe SPAK-u nuk po bën gjë tjetër thjesht po lufton dhe po i hap rrugën Shqipërisë drejt BE-së.

Duket se ka mbetur e vetmja qelizë në luftë kundër krimit dhe korrupsionit, i vetmi institucion me standarde europiane që po i jep Shqipërisë mundësinë për të ecur përpara duke luftuar korrupsionin në administratën e lartë shtetërore dhe në politikë.

Por Mero nuk na e thekson kështu siç është e vërteta, por na thotë mund të ketë probleme integrimi drejt BE-së se prokurorët kanë bërë padrejtësi me Erion Veliajn, ndërkohë që nuk janë prokurorët që e mbajnë në burg Erion Veliajn.

Prokurorët e hetojnë dhe ngrenë akuzat, në rast se prokurorët nuk i provojnë ato Erion Veliaj është mbajtur padrejtësisht në burg.

Por deri tani janë të paktën 3 vendime gjykatash, të cilat kanë konfirmuar burgosjen e Erion Veliajt për shkak të veprave të rënda penale që ai ka konsumuar.

Nga ana tjetër, Mero Baze kërkon të na thotë se integrimi në BE rrezikohet nga Erioni.

Asnjë integrim në BE nuk rrezikohet nga Erioni.

Por në rast se ky i fundit do të ishte i lirë ne do të kishim një drejtësi të kapur dhe të korruptuar nga pushteti dhe atëherë do të ndizeshin sirenat e alarmit për integrimin në BE.

Për sa kohë SPAK-u po bën detyrën, po merr vendime gjykatash të qarta, duke gjetur prova për korrupsionin dhe shkeljet ligjore të Erion Veliajt, rruga drejt BE-së është më e sigurt se kurrë.

Ndoshta Mero do të qajë, ndoshta do të qeshë, por rruga e Shqipërisë për në BE nuk kalon nga Erion Veliaj, edhe pse Mero mund të paguhet nga lekët e pista të Erion Veliajt apo familjarëve të tij që shpërndajnë reklama apo njerëz që dikë e kthejnë nga një “çorape” këllirë në një “çorape” të pasuruar./ CNA





Lajmet e fundit nga