Shtyhet seanca/ "Babalja" dhe avokatët mungojnë për arsye shëndetësore

24 Prill 2024, 10:24, Aktualitet CNA

Shtyhet seanca/ "Babalja" dhe avokatët mungojnë për

Është shtyrë për në 8 maj seanca gjyqsore në Gjykatën e Apelit për çështjen "Babale".

Në Apel kjo çështje po gjykohet nga një treshe gjykuese me relatore gjyqtaren Elona Toro dhe anëtarë gjyqtarët Iliba Bezati dhe Genti Shala.

Në seancën që pritej të zhvillohet të mëkurën, Salianji dhe avokati i tij nuk ishin të pranishëm për arsye shëndetësore.

Deputeti i Partisë Demokratike, Ervin Salianji, kundërshton dënimin me 1 vit burg të dhënë nga Gjykata e Tiranës në dhjetor të vitit 2019, pasi u shpall fajtor për akuzën e “kallëzimit të rremë”.

Çështja "Babale"

Deputeti demokrat që njihet si “Babalja”, i cili prej 5 vitesh endet nëpër gjykata, bën gjithçka për ta zvarritur këtë proces dhe në fund tenton të dalë “i larë”.

Gjithçka nisi në pranverën e vitit 2018, kur Salianji doli publikisht me një audio incizim, ku sipas tij, vëllai i ministrit të Brendshëm të asaj kohe, Fatmir Xhafaj, ishte i përfshirë në trafik droge.

Pra, sipas audio-përgjimit, që në fakt rezultoi të ishte një material i montuar, vëllai i Fatmir Xhafajt, Agron Xhafaj, akuzohej se ishte kapur në përgjim me një ish-trafikant, Albert Veliu (Babalja).

Por, nga hetimet rezultoi se Fredi Alizoti ishte personi që në disa raste bën zërin e Agron Xhafajt (në rol). Videopërgjimi dhe intervista e Babales është realizuar nga gazetari Jetmir Olldashi.

Sipas dosjes së hetimit, Albert Veliu, i njohur si Babalja, është akomoduar në selinë e PD-së ku ka dhënë edhe intervistën. Biseda e stimuluar mes Albert Veliut dhe Fredi Alizotit është regjistruar në janar 2018. Ajo është regjistruar në një aparat regjistrimi me stilolaps të cilin Albert Veliu ia dorëzoi Ervin Salianjit.

Fredi Alizoti është dënuar nga gjykata me 2 vjet burgim më 18 dhjetor 2019. Gjykata vendosi gjithashtu dënimin e Albert Veliut me 3 vjet e 6 muaj burg./CNA