web counter
LEXO PA REKLAMA!

SHKARKO APP

App Store
Google Play

E fundit!

x

Rezoluta për Fredi Belerin/ Reagon Rama: PPE me siguri nuk është e informuar mirë

5 Shtator 2023, 15:58, Politikë CNA

Rezoluta për Fredi Belerin/ Reagon Rama: PPE me siguri nuk është

Kryeministri Edi Rama ka reaguar për rezolutën mbështetëse për kryebashkiakun e zgjedhur të Himarës, Fredi Belerin, e cila u miratua këtë të martë në Parlamentin Evropian.

Me anë të një statusi në rrjetet sociale, Rama thotë se Partia Popullore Europiane, e cila miratoi rezolutën, nuk e specifikon saktë se cilave autoritete u drejtohet.

Ai shprehet se me siguri PPE nuk është e informuar se mosbetimi i Belerit nuk është rezultati i zgjedhjeve, por i gjykatave.

Kreu i qeverisë thekson se do të ishte shqetësuese nëse PPE ngre zërin për një person që është subjekt i SPAK për korrupsion.

Reagimi i plotë:

Interesante! "Ne i bëjmë thirrje autoriteteve shqiptare"... Një thirrje pa specifikuar se për cilat autoritete dhe, me siguri, pa qenë të informuar se në këtë rast problemi nuk është rezultati i zgjedhjeve, por i gjykatave, të cilat e kanë refuzuar një kërkesë të tillë. E përdora "me siguri" sepse do të ishte vërtetë shqetësuese nëse Partia e madhe Popullore Europiane do të kalonte një rezolutë me titullin "Sundimi i Ligjit" për të kërkuar një rezultat tjetër nga ai që është vendosur nga Prokuroria Speciale për Korrupsionin e Krimin e Organizuar dhe Gjykatat Speciale me të njëjtën emër.

Këto institucione u themeluan me mbështetje të plotë nga BE&SHBA dhe ndihmohen ngushtësisht nga SHBA&BE në punën e tyre deri këtu mbresëlënëse kundër korrupsionit dhe krimit të organizuar. Nëse është e nevojshme, jemi më shumë se të gatshëm të sigurojmë udhëheqjen e lartë të EPP-së me informacion mbi këtë çështje në çdo format dhe në çdo kohë.

S’ka dyshim, se të gjitha autoritetet shqiptare e presin me shumë besim mbështetjen e vazhdueshme të EPP-së, si një zë i fortë i Europës sonë gjatë kësaj faze ndryshimi historik për vendin tonë, ku më në fund, zyrtarët e lartë po hetohen me thellësi përtej anësive politike, çka shënon fundin e një epoke të gjatë të pandëshkueshmërisë./ CNA





Lajmet e fundit nga