Rama pas sulmeve ndaj SPAK-ut, elozhe Dumanit

19 Mars 2025, 11:20, Politikë CNA

Pas arrestimit të kryebashkiakut të Tiranës, Erion Veliaj, më 10 shkurt, për dy vepra penale të rënda si korrupsion dhe pastrim të produkteve të veprës penale, kryeministri Edi Rama nisi një fushatë sulmesh të njëpasnjëshme ndaj prokurorëve dhe gjyqtarëve që kishin çuar prapa hekurave Veliajn.

Në daljet e tij publike madje Rama i dërgonte mesazhe intimiduese gjyqtarit dhe prokurorit të çështjes së Veliajt.

Por javët e fundit ka ndryshuar tërësisht qëndrim. Tani vjen më me tone të zbutura. Gjatë takimit me kandidatët e PS-së në Elbasan, Rama i ka thurur elozhe Dumanit.

Ai u shpreh se Dumani ka respektin dhe solidaritetin e tij dhe të PS-së për punën që bën pavarësisht kërcënimeve dhe sulmeve që merr bashkë me familjarët dhe disa prokurorë të tjerë.

Rama e cilësoi Dumanin si një prokuror me virtyte dhe të pavarur.

“Për herë të parë sot populli shqiptar sheh njerëz të lidhur me pushtetin politik që merren e hetohen nga prokurorët të pavarur gjykohen nga gjykatës të pavarur, nuk ka rëndësi fare që mund të ketë brenda atij procesi gjëra që nuk shkojnë e gjëra që janë çudira në vete, për herë të parë është ana historike.

Ne nuk do t’i lëmë shqiptarët të kujtojnë se kjo punë u krye se erdhi Altin Dumani. Nuk është puna se doli Altin Dumani që ka të gjithë respektin dhe solidaritetin tim dhe tonë për punën që bën, por edhe për sulmet kafshërore për kërcënimet që ka marrë bashkë me familjarët dhe me një pjesë të prokurorëve atje.

Altin Dumani ka qenë aty prokuror nuk e di sa vjet, ka dhe virtytet, nuk besoj se i erdhën nga reforma, i ka pasur se njerëzit o i kanë ose nuk i kanë, pse nuk thirri Altin Dumani ndonjë politikan gjithë ato vite që ka qenë prokuror. T’i thërriste, hajde këtu njëherë. Pse nuk hetoi?

Pse nuk doli ndonjë i gjykatës të thoshte bjere këto o Altin se do ta gjykoj unë?

Zero, jo hetuar, po as thirrur sepse nuk është çështja e Altinit e 'X' apo 'Y', është çështja e shpatës. Nuk kishte shpatë në dorë Altini. Shpatën në dorë e kishte pushteti politik. Atë shpatën që ka në dorë zonja e drejtësisë, statuja simbol e drejtësisë e mbante në dorë pushteti politik që nga 1912”, tha Rama./ CNA