web counter
LEXO PA REKLAMA!

SHKARKO APP

App Store
Google Play

Rama nga Beogradi: I shpreh respektin tim Vuçiçit, ka dhënë sinjal për paqen

2 Shtator 2022, 10:42, Politikë CNA

Kryeministri Edi Rama ka marrë pjesë në ditën e dytë të samitit të “Open Balkan” i cili po zhvillohet në Beograd.

Gjatë fjalës së tij, Rama u shpreh se është e rëndësishme që kësaj nisme t’i bashkohen të gjitha vendet e rajonit, dhe jo vetëm.

"Jam i kënaqur që këtu sot me ne janë edhe 2 miq shumë të rëndësishëm për ne që përfaqësojnë dy vende po kaq të rëndësishme për rajonin tonë. Ministri i Jashtëm i Turqisë, të cilin dua ta falenderoj për praninë e tij. Turqia është një partner i pazëvendësueshëm strategjik i Shqipërisë por edhe një aleat i gjithë proceseve pozitive në vendin tonë. Po ashtu edhe ministri i Jashtëm i Hungarisë, të cilin gjithashtu dua ta falenderoj. Për ne është shumë e rëndësishme që kësaj nisme t’i bashkohen të gjitha vendet e rajonit tonë dhe t’i bashkangjiten edhe vende kaq të rëndësishme sa Turqia, Italia, Greqi si dhe Hungaria".

Rama u shpreh se Ballkani është për Evropën po kaq i rëndësishëm sa ç'është Evropa për Ballkanin.

Gjithashtu ai shprehu respekt ndaj presidentit serb për të cilin tha se ka dhënë një sinjal shumë të qartë për të gjithë, që zgjedhja e parë është paqja.

“ Dita e djeshme tregoi se cila është rruga dhe cila është zgjedhja e Ballkanit të Hapur. Sot dua ta them me krenari që edhe zgjidhja e lëvizjes me karta identiteti është një zgjidhje e Ballkanit të Hapur. Dua t’i shpreh respektin tim presidentit të Serbisë që ka dhënë një sinjal shumë të qartë për të gjithë, që zgjedhja e parë është paqja”, tha Rama./CNA.al





Lajmet e fundit nga