Rama “godet” sërish “Top Channel”/ Shpif pa hesap, e neveritshme ku ka arritur

20 Korrik 2022, 19:13, Politikë CNA

Rama “godet” sërish “Top Channel”/ Shpif pa hesap,

Kryeministri Edi Rama

Kryeministri Edi Rama ka sulmuar sërish pak minuta më parë televizionin “Top Channel” në lidhje me lajmin se hakerat kanë shkatërruar të dhënat e shtetit shqiptar dhe kanë kërkuar 30 milionë euro në Bitcoin si shpërblim për të liruar sistemin.

Gjatë një takimi me drejtuesit e rinj të degëve të PS-së, Rama tha se është e neveritshme të shikosh se ku ka arritur media, duke raportuar lajme të rreme.

Kreu i qeverisë theksoi se është e paimagjinueshme të shpifet pa hesap, pa përgjegjësi dhe pa asnjë lloj logjike, duke theksuar se ekzistojnë banda dixhitale që vënë gjoba.

“Platforma është kthyer në punë në pjesën më të madhe të shërbimeve. Pas një sulmi shumë kompleks që ne besojmë, që unë po them atë që besojnë ekspertët. Është një sulm i organizuar nga një shtet. Nuk është çështje hakerash, sado të zot. Është një shtet prapa këtij sulmi. Nuk jemi në gjendje të identifikojmë me bindje të plotë shtetin. Dy janë shtetet që dyshojmë.

E them këtë për të thënë që sulmi është jashtëzakonisht kompleks dhe agresiv. Sistemet nuk kanë çeduar në aspektin e shkatërrimit të tyre. Nuk janë zhdukur të dhënat e shtetit. Nuk rrijnë ashtu siç mendojnë qytetarët se e kemi shpjeguar 1 mijë herë që AKSHI nuk mban të dhëna. E para, dokumentet janë aty, bëhet fjalë për dokumente zyrtare. Deri më tani kjo është situata. Meqë po flasim për këtë e mos duket sikur po i shmangem kësaj gjëje. Realisht është e neveritshme të shikosh që mediat kanë arritur aty ku nuk thuhet nga pikëpamja e lëshimit të lajmeve të rreme pa lidhje.

U detyrova të bëja një prononcim vetë për "Top Channel"-in sepse është e paimagjinueshme të shpifet pa hesap, pa përgjegjësi, pa asnjë lloj logjike duke u thënë njerëzve që është vendosur një gjobë 30 mln euro ndaj qeverisë, që janë zhdukur të gjitha, a thua se këtu jemi përballë një bande dixhitale që vendosin gjoba. Se banda dixhitale që vënë gjoba në Shqipëri ka, por nuk jemi në këto kushte. Jemi në kushtet e një sulmi kibernetik të supersofistikuar që ka përfshirë në procesin e mbrojtjes dhe kundërsulmit, NATO-n, që të jemi të qartë. Për të kundërsulmuar po punohet me një skuadër përtej skuadrës sonë”, nënvizoi Rama./ B.A. – CNA.al