Rama deklaroi se do të sjellë “Formula 1” në Elbasan/ Boçi e vendos me “shpatulla pas murit”

23 Prill 2023, 16:14, Politikë CNA

Rama deklaroi se do të sjellë “Formula 1” në Elbasan/

Kandidati i koalicionit “Bashkë Fitojmë” për Elbasanin, Luçiano Boçi, u është përgjigjur deklaratave të kryeministrit Edi Rama për garat e “Formulës 1”.

Boçi është shprehur se këto deklarata janë tallje me qytetarët e Elbasanit, qark, i cili është i dyti më i varfër në Shqipëri.

Ai tha se Rama u flet qytetarëve për gara me makina, ndërkohë që ata luftojnë dhe janë në garë çdo ditë për mbijetesë.

Rama, sipas tij, në mënyrë arrogante u tall me qytetarët duke dhënë premtime se do të hapë Motoparkun, në qytetin ku 16.000 njerëz trajtohen me ndihmë ekonomike.

"Edi Rama u rikthye sërish në skenën e krimit të tij!

Ndërkohë që takohesha dhe ndaja pritshmëri tërësisht pozitive me bashkëqytetarë të mi elbasanas në Selanik dhe Athinë të Greqisë, të cilët do të vijnë në 14 maj për të votuar ndryshimin, bashkëpunëtorët më informuan për vizitën e Edi Ramës në Elbasan, apo në vendin e krimit të tij politik.

Erdhi në qarkun e dytë më të varfër të Shqipërisë. Nuk kërkoi ndjesë. U tall sërish. U foli qytetarëve të mi për garat e 'Formulës 1'. Hipokrizi dhe tallje e madhe. U foli për garat me makina njerëzve që janë të sfilitur në garën e tyre të përditshme të mbijetesës falë varfërisë ekstreme.

Foli për Motopark, në qytetin ku 16.000 njerëz trajtohen me ndihmë ekonomike. 16.000 kryefamiljarë marrin para sa për të mbajtur frymën gjallë. Foli pa turp, duke nënqeshur me arrogancë në qytetin me numrin më të madh të personave që janë në paaftësi për të punuar. Foli pa pikë turpi (tamam një tallava burrë) në qytetin me të ardhurat më të ulëta për banor.

E fshehu pas krahëve të tij kandidatin, njësoj siç e ka fshehur në çdo përballje të hapur publike dhe televizive ku e kam sfiduar të flasim për Elbasanin.

Edi Rama e tejkaloi shiritin e verdhë të vendit të krimit, kur foli për aftësinë e PS-së për të ndryshuar Elbasanin. Thënë kjo nga një njeri që ka 10 vjet që është në krye të qeverisë dhe nga një forcë që ka 16 vjet që drejton Elbasanin është jo vetëm cinike, por edhe e pafytyrë.

Me sheshin e boshatisur sot në Elbasan, teksa fliste nga Rrapi i Bezistanit, Edi Rama e mori mesazhin e parë të braktisjes. Paratë e tij për të blerë vota, mbështetje, kohë televizive, rrjete sociale dhe gjithçka tjetër këtë herë do të shkojnë dëm.

Ta kam thënë në Parlament në sy të gjithë shqiptarëve: Në 14 maj unë dhe elbasanllinjtë e mi do ta bëjmë ndryshimin!

Dhe atë punën e gjatësisë mos e përmend më…

Ti je shembulli tipik se si një njeri shtatlartë është moralisht një krijesë tmerrësisht e ulët…", u shpreh ai./CNA.al