Pyetje publike për kryeministrin Edi Rama!

4 Shkurt 2025, 18:03, Politikë CNA

Kryeministri Edi Rama shpesh rreh gjoksin duke deklaruar se PS është forca më e madhe, që PS ka bërë Reformën në Drejtësi, që PS e çliroi drejtësinë nga kthetrat e politikës.

Për një moment po e marrim të mirëqenë atë që thotë z.kryeministër që janë më të mirët dhe më të mirë se ata nuk ka, atëherë si është e mundur që një numër i konsiderueshëm i bashkëpunëtorëve të tij janë nën hetim nga SPAK dhe një numër po aq i madh ndodhet në burg për korrupsion, abuzime me tenderë dhe shpërdorim detyre?

Z.Rama flet për “arritjet historike” të PS-së dhe duke marrë shkas nga kjo do t’i drejtojmë disa pyetje publike Kryeministrit, për aferat masive gjatë qeverisjes së tij.

Në vend që t’i tregojë opinionit publik se kush është më i mirë se kush, a mund të na tregojë kryeministri ynë se çfarë bëri dhe çfarë masash mori kur në vitin 2015 CNA denoncoi me të madhe aferën për inceneratorin e Elbasanit?

Investigimi për inceneratorin e Elbasanit/ U harxhuan miliona euro, ka punuar vetëm 1 ditë e gjysmë
18 Janar, 16:40

Po në vitin 2017 kur CNA denoncoi vjedhjen e shekullit atë të inceneratorit të Tiranës?
Për të shkuar më tej në vitin 2020 ku zbardhi të gjithë skemën e vjedhjes që po ndodhte me inceneratorin fantazëm të Tiranës? Kur zbuluam me dokumente dhe fakte të gjithë gropën e korrupsionit dhe grupin e strukturuar kriminal?

Çfarë bëri z.Rama kur CNA zbardhi dosjen 5D ku drejtorët e Bashkisë së Tiranës rezultuan “përbindësha të pangopur” të parave publike dhe të taksapaguesve shqiptarë? Kur duart e tyre zgjateshin deri tek inceneratorët, ku i zhytur deri në fyt është edhe kryebashkiaku Erion Veliaj, i cili është nën hetim nga SPAK për 4 vepra penale?

Erion Veliaj nën hetim nga SPAK-u
28 Dhjetor, 12:33

Kush i vodhi inceneratorët? Po aferën me oksigjenin mjekësor, që Shqipëria e blen 3-4 herë më shtrenjtë se Maqedonia e Veriut apo Kosova, kush e bëri z.Kryeministër?

Kush e bëri dosjen 5D?
Kush i qarkullonte drejtorët?
Kush e bëri sterilizimin, checkup-in?
Kush i vuri kryetarët e bashkisë që gjysma janë në hetim dhe në burg?
Kush janë bashkëpunëtorët e tyre?

Të gjitha këto raste nuk mund të kenë kaluar poshtë hundës së kryeministrit dhe ky i fundit nuk i ka parë e as dëgjuar si në rastin e Erion Veliajt me drejtorët e tij. Si kryeministër dhe kryetar i partisë në pushtet kryeministri është një person në dijeni të këtyre aferave që në mos nuk i ka dëgjuar nga oborri brenda shtëpisë së tij, i kanë denoncuar mediat për vite e vite me radhë dhe janë lënë në hije, deri në momentin e ardhjes në krye të SPAK të Altin Dumanit, i cili nxori dosjet nga pluhuri dhe nisi hetimet duke çuar pas hekurave shumë zyrtarë, ministra, deputetë, kryetarë bashkish, etj.

Të pranojmë ndershmërinë siç thotë Kryeministri, por jo personin në dijeni që me veprimet dhe mos veprimet e tij i ka përdorur hajdutët në interes të tij. /CNA