“Protesta e hapur për çdo forcë opozitare”/ Thirrja e Muçollarit

23 Janar 2026, 20:58, Politikë CNA

“Protesta e hapur për çdo forcë opozitare”/ Thirrja

Anëtari i Kryesisë së Partisë Demokratike, Grigels Muçollari, në një intervistë për CNA është shprehur se pritet që në protestën e ditës së nesërme të ketë një pjesëmarrje të gjerë qytetare.

Sipas Muçollarit, sot qytetarët shqiptarë po përballen drejtpërdrejt me pasojat e korrupsionit strukturor, rritjes së vazhdueshme të çmimeve, pamundësisë për të blerë apo marrë me qira një banesë, pasigurisë ekonomike dhe mungesës së perspektivës, veçanërisht për të rinjtë.

“Presim pjesëmarrje të gjerë qytetare, përtej anëtarësisë së opozitës. Sot qytetarët janë të prekur drejtpërdrejt nga keqqeverisja, korrupsioni strukturor galopant, nga rritja e çmimeve, pamundësia për të blerë apo marrë me qira banesë, nga pasiguria ekonomike dhe mungesa e perspektivës. Kjo protestë është një reagim ndaj një qeverisjeje që ka dështuar dhe nuk lejon rotacion përmes votës së lirë”, tha Muçollari.

Muçollari tha se protesta është e hapur për çdo forcë opozitare dhe çdo qytetar që kërkon zgjedhje të lira.

“Kjo protestë është e hapur për çdo forcë opozitare dhe për çdo qytetar që kërkon zgjedhje të lira. Kërkesa për qeveri teknike nuk është kërkesë partiake, por kusht minimal demokratik për të garantuar një proces zgjedhor të ndershëm dhe konkurrues për të gjitha partitë”, thekson anëtari i Kryesisë së PD.

Muçollari u është drejtuar qytetarëve me një thirrje.

“Kjo protestë është për jetën tuaj të përditshme. Për familjet që nuk përballojnë dot qiranë, për prindërit që punojnë gjithë muajin dhe sërish nuk ia dalin, për të rinjtë që nuk shohin më të ardhme këtu dhe detyrohen të largohen. Për pensionistët që ju kanë marrë dinjitetin. Nuk mund të jetë normale që në një vend të vogël të pasurohet një grusht njerëzish, ndërsa shumica jeton me frikën e faturës së radhës.

Kur vota vidhet, kur korrupsioni mbrohet nga pushteti, kur Parlamenti hesht dhe shteti nuk funksionon më, qytetarët kanë vetëm një rrugë: të ngrihen dhe të flasin. Kjo protestë është për dinjitetin, për të drejtën për të jetuar me punën tënde, për të pasur një shtet që të mbron dhe jo që të shtyp.

Dalja në protestë është kërkesë për qeveri teknike dhe zgjedhje të lira, por mbi të gjitha është kërkesë për shpresë. Heshtja sot do të thotë pranim i varfërisë, padrejtësisë dhe shkretëtimit të Shqipërisë nesër”./ CNA