“Marshimi nesër do jetë historik”/ Këlliçi: Sovrani do të kërkojë largimin e qeverisë më të korruptuar në Europë

23 Janar 2026, 18:43, Politikë CNA

“Marshimi nesër do jetë historik”/ Këlliçi:

Opozita nesër do të protestojë kundër qeverisë dhe kryeministrit Edi Rama në orën 17:00.

Deputeti i PD-së Belind Këlliçi në një intervistë për CNA është shprehur se protesta nesër do të jetë edhe më masive dhe e fuqishme se protestat e mëparshme.

“Protestat e opozitës kanë qenë gjithnjë masive, të fuqishme, me mesazh dhe ja kanë arritur të ndërgjegjësojnë opinionin vendas e ndërkombëtar për problemet e vendit. Protesta nesër do jetë edhe më masive, dhe më e fuqishme se më parë. Qeverisja e keqe ka kulmuar, rastet e fundit të korrupsionit qeveritar janë tronditëse dhe lidhjet kriminale të Edi Ramës, alarmante”, u shpreh Këlliçi.

Më tej, deputeti theksoi se marshimi nesër do të jetë historik, pasi qytetarëve nuk u ka ngelur asnjë instrument tjetër përveç revoltës.

“Qytetarëve nuk u ka ngelur asnjë instrument tjetër në dorë për të gjetur zgjidhje, përveç revoltës. Edi Rama ka kapur çdo institucion e çdo hapësirë. Shqiptarët kanë në anën e tyre vetëm fuqinë e vet secili dhe Partinë Demokratike. Në këto kushte, mendoj dhe besoj se marshimi nesër do të jetë historik”, deklaroi Këlliçi.

I pyetur se si do të jenë të organizuar, deputeti është shprehur se, protesta nuk ka një skaletë, por sovrani do të zbresë në bulevard me të drejtën e tij për të kërkuar largimin e qeverisë më të korruptuar dhe inkriminuar të Europës.

“Nuk është një event që ka një skalete, një organizim. Bashkimi popullor në shesh ka ligjësitë e rregullat e veta. Sovrani zbret në bulevard me të drejtën e tij, për të kërkuar ndaljen e qeverisë më të korruptuar dhe më të inkriminuar në Europë”, deklaroi Këlliçi.

Sa i përket skenarëve të protestës, deputeti tha për CNA se:

"Siç e thashë, skenari është ai i sovranit që ka duruar shumë një qeverisje të korruptuar dhe të lidhur me krimin e organizuar e kartelet.

Shtoi kësaj, faktin që tani që është kapur vetë me presh në duar, Edi Rama po kërkon të bllokojë dhe drejtësinë, dhe jemi kështu në kushtet e një padrejtësie ekstreme. Këto rrethana, ofrojnë skenarin e popullit që ka të drejtën të ndalë një regjim", tha deputeti.

Ndër të tjera, Këlliçi parashikon se pjesëmarrja në protestë do të jetë masive.

“Masive, e pandalshme. Kjo nga të dhënat që kemi, nga komunikimet e përditshme me qytetarët. Durimi është në skaj. Revolta është në nivele të pahasura ndonjëherë”, u shpreh deputeti.

“Opozita është e vetmja përfaqësuese e gjendjes sot të njerëzve, ndaj dhe bulevardi do oshëtijë si asnjëherë më parë”, shtoi ai./ CNA