Përplasjet në Zvërnec/ Leskaj: Pasojë e ndryshimeve ligjore për zonat e mbrojtura

1 Qershor 2026, 20:46, Politikë CNA

Përplasjet në Zvërnec/ Leskaj: Pasojë e ndryshimeve ligjore

Deputeti Bujar Leskaj ka reaguar lidhur me ngjarjet e fundit në Zvërnec, duke dënuar dhunën e ushtruar ndaj protestuesve dhe duke e cilësuar kryeministrin Edi Rama si përgjegjës për situatën e krijuar.

Leskaj u shpreh se në një shtet ligjor nuk mund të ketë asnjë justifikim për përdorimin e dhunës ndaj qytetarëve që protestojnë në mënyrë paqësore.

Sipas tij, ngjarja nuk mund të reduktohet në tejkalim kompetencash nga disa efektivë policie apo në gabime komunikimi nga drejtues lokalë të policisë.

Ai argumentoi se përplasjet janë pasojë e drejtpërdrejtë e mungesës së transparencës dhe keqqeverisjes, duke akuzuar qeverinë se ka krijuar kushtet për konfliktin përmes ndryshimeve ligjore në ligjin për zonat e mbrojtura.

Ai theksoi se përgjegjësia për ngjarjen nuk mund t’u atribuohet banorëve të zonës, investitorit apo organizatave mjedisore. Sipas tij, investitorët veprojnë brenda kuadrit ligjor të krijuar nga shteti, ndërsa organizatat mjedisore kërkojnë më shumë transparencë në proceset vendimmarrëse.

Leskaj kritikoi gjithashtu masat e ndërmarra pas incidentit, duke i cilësuar të pajustifikuara disa prej shkarkimeve në radhët e Policisë së Shtetit.

“Dënoj me forcë dhunën e ushtuar ndaj protestuesve në Zvërnec. Në një shtet ligjor, nuk mund të ketë asnjë justifikim për sulme fizike. Dhuna e ushtruar ndaj protestuesve paqësorë, nuk është thjeshtë punë tejkalimi kompetencash nga 2-3 policë privatë, apo një deklaratë e hartuar gabim nga drejtuesit e Policisë Vlorë, por është më e thellë. Është pasojë e drejtpërdrejtë e keqqeverisjes së sektit Rama. Rama është gjeneratori i përplasjes sociale dhe mungesës së transparencës. Reagimet e tij të sotme duken më shumë si përpjekje për të justifikuar veten, sesa për të bërë transparencë.

Rama duhet t’u japë llogari shqiptarëve pse ka gjeneruar ndryshimet ligjore në ligjin për zonat e mbrojtura që sollën edhe përplasjet në Zvërnec. Duhet të përgjigjet për pasojat që këto ndryshime ligjore dhe ligje të tjera të qepura me porosi kanë sjellë në terren. Në përplasjen në 30 maj në Zvërnec, nuk mund të fajësohen kurrësesi banorët. Por nuk mund të fajësohet as investitori, sepse çdo subjekt ekonomik kërkon të zgjerojë aktivitetin e tij, brenda kornizave që i krijon shteti dhe kornizave të ligjshme që ka nënshkruar. Nuk mund të fajësohen as shoqatat mjedisore, që kërkojnë më shumë transparencë.

Fajtori i vetëm është sektri Rama në pushtet, që ka bërë që shteti të mungojë në transparencë dhe vendimmarrje të qartë. Me valën e arrestimeve dhe pushimeve nga puna në Polici, që këto të dytat janë krejtësisht të paarsyeshme, Rama nuk mund të fshihet si fsheh struci kokën në rërë. Si qytetar i Vlorës, denoncoj në këtë foltore të shenjtë qëndrimin e qarqeve politike e mediatike greke, sipas të cilave Zvërneci është i banuar nga minoritarët me kombësi greke. Është shumë e shëmtuar përdorimi i një ngjarjeje të veçantë si dhuna në Zvërnec, për të mbështetur pretendime politike apo historike të pabazuara, që nuk përputhen me realitetin historik apo demografik të zonës”, tha Leskaj.