PD denoncon gjendjen e rrugëve në Laprakë/ Thirrje Veliajt: Mbyll punët e pabëra në 8 vite

10 Prill 2023, 13:28, Politikë CNA

PD denoncon gjendjen e rrugëve në Laprakë/ Thirrje Veliajt: Mbyll

Zëdhënësja e fushatës së kandidatit të opozitës për Bashkinë e Tiranës, Silvi Bardhi, ka denoncuar gjendjen e rrugëve në zonën e Laprakës në Tiranë.

Qytetarët, të shqetësuar, kanë treguar se rruga është e pashtruar, pa energji elektrike dhe ndër të tjera mungon ujësjellësi.

Bardhi i ka bërë thirrje kryebashkiakut Erion Veliaj që të mbyllë me urgjencë punët e pabëra në këto 8 vite.

"Rreth 10 km larg qendrës së Tiranës, në Laprakë, rrugët janë të pashtruara, pa ndriçim, pa sistem kanalizimi, pa ujësjellës.

Ndryshe nga asfalti elektoral, i cili shtrohet në zemër të kryeqytetit, një tjetër realitet shfaqet për qindra familje.

Një prej banorëve i tha zëdhënëses së opozitës për Bashkinë e Tiranës, Silvi Bardhi, se askush nuk ka shkuar t’i shohë kushtet në të cilat jetojnë. "As për asfalt elektoral nuk kanë ardhur", tha ai.

“Ne kemi 25 vjet që na premtojnë shtrimin e rrugës dhe shihe në çfarë gjendje është. Si para 25 vitesh si tani. Vijnë vetëm përpara fushatës, premtojnë, premtojnë dhe s’bëjnë asgjë”.

Një tjetër banor tha: “U bëmë 30 vjet që jemi këtu në rrugën 'Gjergj Legisi' dhe kjo rrugica 'Muharrem Bajraktari', është mesjetë. Fshati më i largët i Shqipërisë është rregulluar, mesi i Tiranës është këtu, është shkatërruar. Rrugë të paasfaltuara, pa drita, pa ujë të pijshëm, pa asfalt”.

“Problemi i lagjes sonë, i kësaj rruge në përgjithësi, që fillon nga 'Josif Pashko' dhe mbaron te 'Malajziani' është problemi me precedent. Na kanë bërë premtime, na kanë dhënë llafet më të bukura në çdo lloj fushate që është bërë këtu, asnjë punë nuk na është bërë”, tha një prej banorëve.

"Këto ishin qëndrimet e banorëve të Laprakës. Një makineri, e cila qëndron në një nga dhjetëra rrugë të shkatërruara të Laprakës simbolizon propagandën e Bashkisë Tiranë, e cila mundohet që me urgjencë të kryejë punët e pabëra në 8 vite. E vërteta është kjo, Bashkia Tiranë nuk ka investuar asgjë për kryqytetin dhe qytetarët e saj", shkruan ajo./CNA.al

PD denoncon gjendjen e rrugëve në Laprakë/ Thirrje Veliajt: Mbyll