web counter
LEXO PA REKLAMA!

SHKARKO APP

App Store
Google Play

“Paratë e kartelit Sinaloa po pastrohen në Shqipëri”/ Deputeti i PD-së: SPAK duhet të veprojë

13 Nëntor 2025, 21:27, Politikë CNA

“Paratë e kartelit Sinaloa po pastrohen në Shqipëri”/

Deputeti i Partisë Demokratike, Gjin Gjoni, ka denoncuar pastrimin e parave të kartelit famëkeq Sinaloa në Shqipëri, duke kërkuar ndërhyrjen e SPAK dhe autoriteteve të tjera.

Sipas Gjonit, një sipërmarrës shqiptar, i cili ka marrë licencë në një zyrë të qeverisë, është sanksionuar nga Departamenti i Shtetit Amerikan për pastrim parash për këtë kartel, që SHBA e ka shpallur organizatë terroriste.

Deputeti demokrat thotë se është koha që SPAK të zbatojë direktivat amerikane dhe të nisë hetimet për pastrimin e parave të drogës dhe korrupsionin në sektorin ekonomik.

“Sinaloa ka pastruar para në Shqipëri, pas SHBA-së, duhet të vihet në lëvizje edhe SPAK. Në ndërtim dhe në bregdet po derdhen miliarda të krimit!

Sot, një sipërmarrës që ka marrë licencë në zyrën e Ramës është sanksionuar nga Departamenti i Shtetit Amerikan (DASH), pasi ka pastruar para për kartelin famëkeq Sinaloa, të cilin SHBA e ka shpallur organizatë terroriste.

Ky zhvillim e shpall Shqipërinë de facto një narkoshtet. Edhe në raportimin e Dumanit në Komisionin e Ligjeve dhe në Parlament, i kam kërkuar të hetojë pastrimin e parave të drogës në strukturat hoteliere dhe në ndërtim.

Bregdeti në tërësi, një prej destinacioneve kryesore turistike, po ndërtohet masivisht. Sipërmarrës të ndershëm më janë shprehur se po konkurrohen padrejtësisht nga paratë e drogës, dhe shumë prej tyre më kanë pohuar se kanë zgjedhur të bëjnë denoncime në SPAK dhe në ambasada.

Koha është që SPAK të zgjohet, të zbatojë direktivat që Dumani mori në DASH dhe të luftojë pastrimin e parave të drogës dhe korrupsionin në ekonomi”, ka deklaruar deputeti i PD-së./ CNA





Lajmet e fundit nga