"Paketa e Maleve"/ Rama: Po ecet me një ritëm jashtëzakonisht të ulët

23 Tetor 2025, 12:41, Politikë CNA

"Paketa e Maleve"/ Rama: Po ecet me një ritëm

Kryeministri Edi Rama ka qenë i pranishëm në prezantimin e “Paketës së Maleve”. Gjatë fjalës së tij, Rama tha se kjo paketë aktualisht po has në disa problematika, pasi po ecet me një ritëm jashtëzakonisht të ulët.

Kjo, tha Rama, bie ndesh me atë që është në thellb “Paketa e Maleve”, që duhet të ketë shpejtësi në dhënien e përgjigjes për aplikuesit. Kryeministri deklaroi se ka udhëzuar disa deputetë të bëjnë amendimet e nevojshme për lehtësimin e ligjit nga ngarkesat e panevojshme.

Më tej, Rama tha se atyre personave që e kanë tokën e tyre, por nuk e kanë me letra, aksesi u është lehtësuar, por ka një komplikim sa i përket miratimit të gjithë kufitarëve, pasi ndonjëherë nuk bien dakord apo në raste të tjera nuk gjenden.

Për këtë, tha Rama, u krijua “Paketa e Maleve”, që zotëruesit e tokës të aplikojnë në bashki për të ndërtuar ferma apo agroturizme.

“Fakti që në ditën e parë që u hap kanali i komunikimin online lidhur me këtë paketë, pati 800 shprehje interesi nga shumica dërrmuese e shqiptarëve jashtë Shqipërisë, flet vetë për fuqinë e paketës. Nga ana tjetër e bëjmë këtë takim sepse kemi shqetësimin që po ecet me një ritëm jashtëzakonisht të ulët në raport me atë që paketa ka në thelb, shpejtësinë në kuptimin e burokracisë dhe në dhënien e përgjigjes për ata që shprehin interes. Kjo është tërësisht e kundërta e frymës me të cilën u konceptua dhe aprovua paketa. Vetë paketa, e pranoj që ka disa ngarkesa të tepërta nga pikëpamja burokratike, edhe pse është shumë e lehtësuar, aksesi në një pronë që e disponon 'de facto', por jo me letra. Për këtë arsye u kam thënë dhe disa deputetëve të bëjnë amendimet përkatëse të ligjit dhe me shpejtësi të lehtësohet ligji nga ndonjë ngarkesë. Por ngarkesat e ligjit nuk kanë lidhje me vonesën tuaj.

Nëse prisni përgjigje nga ASHK-ja për zonat e evidentuara, nuk keni kuptuar ligjin, paketën, asgjë.

Ka një komplikim të pashmangshëm për të marrë të gjitha miratimet e të gjithë kufitarëve të pronës përkatëse. Gjë që në shumë raste shfaqet se kufitarët mund të jenë në vende të ndryshme të botës, mund të mos gjenden sapo të mos duan. Për këto arsye krijuam paketën, e cila i jep mundësi atij që ka tokën të vijë në bashki dhe të thotë dua të ndërtoj këtu një agroturizëm, një fermë”, u shpreh Rama.