Opozita në Reformën Zgjedhore/ Petrit Vasili: Të kthehet te marrëveshja e 5 qershorit ose të ikë nga tavolina

3 Mars 2026, 15:34, Politikë CNA

Opozita në Reformën Zgjedhore/ Petrit Vasili: Të kthehet te

Politikani Petrit Vasili ka ndarë sot një qëndrim kritik ndaj mazhorancës dhe opozitës për Reformën Zgjedhore.

Përmes një postimi në rrjetet sociale, Vasili shprehet se kjo reformë është kthyer në një refren politik bosh.

Sipas Vasilit, roli i opozitës shqiptare në këtë reformë është thjesht një farsë, pasi, sipas tij, i shërben mazhorancës dhe zgjidhja më e mirë është të largohet nga tryeza e komisionit, për të mos e rënduar më shumë imazhin e vet para shqiptarëve dhe ndërkombëtarëve.

“Boll me tallavane të Reformës Zgjedhore, të kthehen tek 5 qershori, ose opozita të ikë nga ajo tavolinë!

Reforma zgjedhore është kthyer përfundimisht në një refren politik bosh dhe falimentar, ku palët ulen vazhdimisht në tavolinë, Gjiknuri dhe Bylykbashi janë gjithmonë aty, ndërsa zgjedhjet përfundojnë gjithmonë në greminë dhe rrëmbehen nga Rama.

Opozita shqiptare duhet ta kuptojë se pjesëmarrja në këtë Komision është thjesht një shërbim që i bëhet farsës zgjedhore dhe jo zgjidhje e saj.

Kjo farsë i shërben vetëm Ramës dhe askujt tjetër dhe tregon një opozitë me komplekse, që druhet se çfarë do thonë ca të huaj të korruptuar nga Rama.

Refreni i përsëritur për arritjen e drafteve konsensuale të ndryshimeve ligjore është një broçkull e dëgjuar dhe stërdëgjuar, që nuk ka dhënë as më të voglin rezultat në praktikë, por përkundrazi ka ricikluar zgjedhje më të neveritshme se ato të mëparshmet.

Shembulli emblematik mbetet marrëveshja e 5 qershorit 2020, që u shkelmua nga Rama.

Marrëveshja e 5 qershorit pati konsensualitet dhe u mbështet ndërkombëtarisht si asnjë marrëveshje tjetër.

U përgatit në ambasadën amerikane në Tiranë dhe dëshmitarë të firmosjes ishin tre ambasadorë: ai i SHBA-së, BE-së dhe i Britanisë së Madhe.

Sekretari i Shtetit Pompeo, Bashkimi Europian dhe OSBE përshëndetën botërisht marrëveshjen.

Realiteti tregoi se Edi Rama e shkeli marrëveshjen e 5 qershorit, si dhe ndryshoi edhe Kushtetutën brenda ditës.

Sot opozita ka realisht zero garanci ndërkombëtare krahasuar me 5 qershorin.

Atëherë lind pyetja: çfarë bën opozita në atë tryezë farsë, produkti i të cilës është i parathënë me fjalë të thjeshta: “pra të bëjmë sa për sy e faqe ca ndryshime për të thënë që bëmë reformë”.

Qejfin e kujt plotëson opozita në atë tryezë ku personazhet janë sërish Gjiknuri dhe Bylykbashi?

Dy reforma zgjedhore farsë që prodhuan dy palë zgjedhje në 2021 dhe 2025, njëra me faqe të zezë se tjetra.

Ku në 2025 dështimi më spektakolar ishte vota e emigrantëve, që përfundoi për faqe të zezë.

Ndaj zgjidhja është shumë e thjeshtë.

Nëse opozita beson se do të arrijë ndonjë rezultat në këtë Komision të Reformës Zgjedhore, le të vërë në tavolinë si propozim të panegociueshëm marrëveshjen e 5 qershorit, për të cilin Rama dhe rilindja kishin dhënë dakordësi me shkrim bile.

Nëse Gjiknuri dhe maxhoranca e refuzojnë 5 qershorin, opozita duhet të ikë me vrap nga ajo tavolinë për të mos u bërë qesharake dhe e pabesueshme në sytë e shqiptarëve.

P.S. Në foto është dakordësia me shkrim e Gjiknurit për 5 qershorin”,-shkruan Vasili./CNA