Nesër do të diskutohet reforma zgjedhore/ Këlliçi i përgjigjet Ballës: Nuk ka pasur dakordësi, ky është "fake news"

15 Tetor 2025, 16:02, Politikë CNA

Nesër do të diskutohet reforma zgjedhore/ Këlliçi i

Ditën e sotme kryetari i Grupit Parlamentar të Partisë Socialiste, Taulant Balla, deklaroi se nesër do të ngrihet Komisioni për Reformën Zgjedhore dhe do të bëhet me konsensus.

"Kur bëhet fjalë për Reformën Zgjedhore është e domosdoshme që edhe partitë parlamentare që s'e kanë një grup parlamentar ose partitë që s'e kanë dashamirësinë e një grupi parlamentar të madh që të heqin deputetë nga vetja dhe t’ua japin atyre të formojnë një grup parlamentar, të jenë të përfaqësuara në Komisionin e Posaçëm të Reformës Zgjedhore. Propozimi ynë ka qenë i njëjtë me atë që është gjithmonë. Të jemi në barabartë edhe në numër, në të drejtën e vetos, garancia më e madhe që dy partitë e mëdha kanë, por PS dëshiron dhe insiston dhe prandaj e kemi lënë pezull vetëm këtë pikë të vendimit që ta miratojmë së bashku edhe partitë e tjera parlamentare të jenë aty. Kur ne shohim se PD-së këto partitë e vogla i duhen, madje u merr borxh edhe kandidatin për kryetar bashkie se vetë nuk kanë, pse duhet t’i përjashtojmë këto parti të vogla nga Reforma Zgjedhore”, tha Balla.

Lidhur me këtë deklaratë, deputeti i Partisë Demokratike, Belind Këlliçi, në një intervistë me gazetaren Ola Bruko, tha se nuk ka konsensus për komisionet dhe ky është "fake news".

Për sa i përket përbërjes së komisioneve të depozituar nga PS në Kuvend Këlliçi deklaroi se opozita e Shqipërisë është koalicioni PD-ASHM.

"Opozita në këtë vend është Partia Demokratike dhe partitë parlamentare që janë pjesë e koalicionit për Shqipërinë Madhështorë që garuan më datë 11 maj, por këtu nuk përjashtoj as partinë e Agron Shehajt, as të Lapajt, as Lëvizjen Bashkë, sepse janë në opozitë, por këto janë partitë opozitare dhe nuk mund të na caktojnë ne përbërjen që pastaj të kenë numrat vetë dhe të rrëzojnë çdo propozim të opozitës dhe Partisë Demokratike dhe ta zgjedhin vetë formatin dhe numrin e bashkive në rastin e reformës territoriale ashtu si e duan vetë apo Kodin Zgjedhor që do të duan vetë.

Ky është një 'fake news', nuk ka pasur një dakordësi, ka pasur një depozitim të kërkesave tona me shkrim nga ana e Gazment Bardhit në emër të Grupit Parlamentar të Partisë Demokratike dhe besoj se nesër do të jetë një çështje diskutimi së bashku me pesë raportet që do të vijnë në Parlament dhe së bashku me ligjin e mbetjeve", tha Këlliçi./CNA